O Museo Massó acollerá materiais recuperados no Forno das Ánforas
Por Redacción
O Conselleiro Xesús Vázquez Abad visitou o Museo Massó de Bueu que conta cun novo programa de actividades dirixidas a aproximar o mundo do mar aos escolares de primaria, secundaria e bacharelato.
Na actualidade, o centro conta cunha exposición permanente baseada na temática da conquista do mar e da explotación dos seus recursos. Destaca nesta mostra o mobiliario da clínica da fábrica de conservas Massó, a colección sobre o deseño e a tipoloxía de envases e os gravados do século XVII sobre a caza da balea, mascaróns de proa e documentos sobre os corsarios.
O museo será o depositario dos materiais recuperados na escavación arqueolóxica do depósito romano situado na praia de Pescadoira, en Bueu, e que é coñecido como Forno de ánforas. Os restos encontrados revelan a importancia da vila como centro de desenvolvemento de actividades de salgadura do peixe. Este forno de fabricación de ánforas é o único localizado no noroeste da Península.
Ademais no Museo continúan desenvolvéndose outras actividades para os escolares. A través do obradoiro En busca do tesouro, destinado aos estudantes de primaria, os nenos terán que encontrar difentes partes dun crebacabezas coma se se tratase dun tesouro.