Davide Salvado e o Aturuxo triunfan nuns Premios Galegos da Música de marcado carácter feminino
O Pazo da Cultura de Pontevedra volveu vestir as súas galas para acoller a segunda cerimonia de entrega dos Premios Galegos da Música, uns galardóns que estanse a consolidar no panorama cultural do noso país. E este ano con dous premios que quedan moi preto da casa. O músico marinense Davide Salvado foi elixido como o mellor do ano na categoría de Música tradicional galega, mentres que o Aturuxo de Bueu é a mellor sala de concertos de 2014.
Todo iso nunha gala que estivo conducida de novo pola compañía Chévere -Premio Nacional de Teatro 2014-. Crearon un espectáculo soberbio que estaba artellado cun obxectivo claro: reivindicar a presenza da muller na música e no mundo. As Fillas Bravas foron as encargadas de presentar a gala, dando paso a sketches no máis puro estilo ultranoite, nos que estiveron acompañadas sobre o escenario por numerosas artistas galegas.
Os premiados nesta segunda edición dos Premios Galegos da Música foron:
- Pop e indie: Ataque Escampe
- Rock: Cró
- Blues, funk & soul: Cats and Monkeys
- Jazz e músicas improvisadas: Sumrrá
- Hip-Hop e músicas urbanas: Wöyza
- Música clásica e contemporánea: Orquestra Vigo 430
- Folque: Cuarteto Caramuxo
- Música tradicional galega: Davide Salvado
- Músicas do mundo: Dos fíos invisibles chegan as cores
- Canción de Autor: A Cada Canto
- Música infantil: Pablo Díaz e a Banda Tic Tac Toc
- Electrónica: Sub Rosa
- Metal: Nao
- Reggae, Ska & Mestizaxe: Zamaramandi
- Orquestras, grupos e música de verbena: Los Satélites
- Premio Organistrum Salas: Aturuxo
- Premio Organistrum Festivais: Festigal
- Premio Organistrum Espazos de Comunicación Musical: Planeta Furancho
Os premios foron entregados por músicos ben coñecidos como Abe Rábade, Mercedes Peón, Susana Seivane, Gloria Mosquera, Santi Cribeiro, Pablo Novoa, García MC e Sonia Lebedinsky.
Ademais, concedeuse o Premio Honorífico Músicos Ao Vivo a N.H.U., un proxecto musical avanzado ao seu tempo, aglutinador dunha xeración de músicos inquedos, inconformistas e entregados a un proxecto minoritario, underground e carente de referentes próximos que trazou novas formas de facer música nunha Galicia recén saída da ditadura franquista.
Os triunfadores da noite levaron a casa unha das estatuíñas que o escultor e músico, Víctor Lorenzo, creou especialmente para o certame a golpe de motoserra, e que xa están bautizadas como Os Melómanos.
Como remate a esta gran festa da música galega, unha emotiva interpretación do tema Matriarcas de Guadi Galego, que cantou acompañada no escenario por ducias de mulleres músicas ás que se sumaron tamén no final todos os premiados desta edición.
Relacionadas:
-
O sector musical galego réndese aos pés do artesán Antón Corral
Por Diego Torrado & Redacción |
-
O 28 de abril, a música galega volverá xuntarse en Pontevedra
Por Alejandro Espiño |
-
"Lobos", o novo disco do marinense Davide Salvado sae á venda o próximo 16 de xuño
Por Alejandro Espiño |
-
The Cornelius, Treixadura, Davide Salvado e Sala Aturuxo, finalistas dos Premios Galegos da Música
Por Alejandro Espiño |