Regresa a Señora de Palmírez... a través da internet
Por Redacción
Chega Radio Migallas a través de internet. A compañía de teatro pontevedresa busca fórmulas para chegar a todos os públicos. A través dun programa radiofónico denominado "Non me fagas falar" que vai renovándose temporalmente, María Campos e Carlos Yus ofrecen diálogos cómicos e críticos sobre algúns dos temas de actualidade como os recortes no ensino, as celebracións de "cumples" para os máis cativos da casa ou os problemas cos libros de texto. Cada mes, na web da compañía ou a través de Youtube poden seguirse as historias propostas por Migallas Teatro.
Nestas intervencións, os membros da compañía recuperan o personaxe da Señora de Palmírez, coñecido polo seu paso polo programa Luar da Televisión de Galicia.
Durante este verán, Migallas Teatro realizou visitas teatralizadas polo centro histórico de Pontevedra.