Un forte proceso gripal obriga a Anni B. Sweet a aprazar o seu concerto en Pontevedra
Por Redacción
Os seguidores da doce voz de Annie B. Sweet terán que esperar dous meses máis para poder gozar dela en directo en Pontevedra. O concerto da malagueña, que tiña previsto celebrarse este venres 22 de marzo na Sala Karma, foi aprazado por motivos de saúde. En concreto, por un forte proceso gripal que levou a que a artista teña que gardar repouso durante os próximos días.
Segundo informa a axencia de representación da artista, Subterfuge Events, nun comunicado, "lamentamos comunicar que por mor dun forte proceso gripal, Anni B. Sweet vese obrigada a aprazar os concertos acústicos que estaban programados para este fin de semana. Sentimos as molestias".
En total, serán tres os concertos que Anni B. Sweet terá que aprazar. O concerto da sala BNB de Burgos pasa ao 3 de maio, o da sala Karma de Pontevedra pasa ao 31 de maio e o da sala Le Club da Coruña pasa ao 1 de xuño. As entradas de todos os concertos seguirán sendo válidas para as novas datas. Aqueles que queiran devolver a súa entrada poden facelo dirixíndose aos puntos de venda onde a adquiriron.