Humor e moita reflexión social en Ponteatro coa obra "Nacidas libres"
Por Redacción & Diego Torrado
Con Nacidas libres, a nova montaxe teatral da compañía Contraproducións, regresou o ciclo Ponteatro. Centos de persoas encheron o patio de butacas do Teatro Principal para gozar cun espectáculo cunha marcada perspectiva de xénero.
A partir dunha noticia real, a liberación en Santiago de tres monxas retidas nun convento contra a súa vontade, Cándido Pazó creou un texto protagonizado por catro actrices que atravesan esas idades nas que corren o risco de desaparecer do mundo do espectáculo.
Fartas de non recibir ofertas de traballo, deciden autoempregarse e montar unha peza. O guion encoméndanllo a unha nova escritora que vive emigrada e que repara nesa noticia.
A partir dela, van preparando un espectáculo no que, con rigor e obxectividade, pero con frescura, dinamismo, emoción e pinceladas de humor, ofrecen múltiples reflexións e referencias a diversos temas como a desigualdade, a ilusión da liberdade, os condicionantes da muller nas distintas culturas ou a emigración.
A obra, interpretada por Rocío González, Casilda Alfaro, Mónica Camaño e Susana Dans, adiantouse a este mércores, xa que a data inicial coincidía co 8- M, Día Internacional da Muller, no que o elenco da compañía secunda a folga feminista.
Ponteatro poñerá en escena unha última obra. Será Casa O'Rei, de Ibuprofeno Teatro, o xoves 3 de maio.
Relacionadas:
-
RADIO.- O Cara a cara pon un nome e apelido ao Día Mundial do Teatro
Por Marisa Ciordia |
-
Ponteatro prolóngase ata primavera achegando ao Principal 'Nacidas libres' e 'Casa O'Rei'
Por Gabriela Varela Asorey |
-
Tres espectáculos de Ponteatro esgotaron todas as entradas á venda
Por Redacción |
-
'A canción do elefante' pecha o ciclo Ponteatro 2017 cun notable éxito de público
Por Mónica Patxot |