O Cineclube pecha tempada en Pontevedra con películas de Jacques Tati e o chinés Hu Bo
Por Alejandro Espiño
Dúas películas do director francés Jacques Tati, unha das grandes referencias do cinema francés do século XX, formarán parte da programación coa que o Cineclube Pontevedra pechará esta tempada. Xunto a el, tamén se proxectarán pezas dos alemáns Wolf- Eckart Bühler e Manfred Blank ou do malogrado realizador chinés Hu Bo.
Mon Oncle, rodada por Tati en 1958, será a primeira proxección. O público pontevedrés poderá gozar desta película, Óscar á mellor película de fala non inglesa, o martes 4 de xuño, ás oito e media da tarde no Teatro Principal.
Nela, a chegada do seu tío revoluciona a vida dun mozo que vive cos seus pais nunha vivenda ultramoderna e provista dos máis avanzados electrodomésticos, entrando nun mundo cheo de soños e fantasía.
A segunda película do director francés que ofrecerá o Cineclube, neste caso, o martes 18 de xuño, será Playtime. Mostra as vivencias cómicas dun grupo de turistas neoiorquinas que están de visita en París durante 24 horas. Do mesmo xeito que a anterior, esta cinta proxectarase en versión orixinal e con subtítulos en castelán.
Entre ambas, o mércores 12 de xuño, ofrecerase a película alemá Pharos of Chaos, dos directores Wolf- Eckart Bühler e Manfred Blank, en colaboración coa Filmoteca de Galicia. Trátase dun documental que descobre a figura do actor Sterling Hayden que, ademais, foi un experto mariñeiro que chegou a comandar barcos con axuda para os partisanos de Iugoslavia.
O Cineclube despedirase ata o outono coa proxección, o mércores 26 ás sete da tarde, da película An Elephant Sitting Still, que nos traslada a unha cidade do norte de China que está sumida nunha néboa perpetua e na que un altercado entre dous adolescentes alterará a vida de catro persoas, vítimas do egoísmo familiar e da violencia social.
O seu director, Hu Bo, era unha das grandes promesas do cinema chinés, formadas na Escola de Cinema de Pequín. Suicidouse pouco antes da estrea da súa primeira longametraxe que chegou a ser premiado no último festival de cinema de Berlín.
Relacionadas:
-
O Cineclube despide outubro con 'Segunda Vez'
Por Enrique Morales |
-
O verán anima ao Cineclube a sacar as súas sesións ao aire libre
Por Redacción |
-
Pontevedra impulsa un ciclo de cine e conferencias para visibilizar a diversidade sexual
Por Alejandro Espiño |
-
O Cine Club Pontevedra, cuarta sede da programación do Centro Galego de Artes da Imaxe
Por Olaya Madrigal |