As bandas de Salcedo e Meaño actúan no Gaiás no marco do Serán'02
Por Redacción
Máis de medio milleiro de intérpretes de bandas de música de toda Galicia danse cita esta fin de semana no Gaiás para participar no Serán’02: II Encontro Galego de Cultura Popular.
O evento, promovido pola Xunta para impulsar e pór de relevo a cultura galega de base, desprega un intenso programa de tres días, enteiramente de balde, con concertos de bandas de música das catro provincias galegas, así como diversas formacións infantís e xuvenís.
Entre as bandas que protagonizan este evento multitudinario atópanse a Banda da Unión Musical de Meaño -que ofreceu un concerto infantil este sábado- e outras seis bandas da provincia de Pontevedra.
Foron a Banda de Lalín, a Banda Artística de Merza, a Unión Musical de Valladares, a Banda de Música de Salceda de Caselas, a Banda de Música de Salcedo ou a Banda da Escola de Música da Agrupación do Rosal.
Este II Encontro Galego de Cultura Popular nace con vocación de dirixirse a todo tipo de público, sexa ou non parte do sector.
Así, o encontro ofrece tanto contidos de tipo profesional como clases maxistrais con músicos recoñecido prestixio, conferencias ou mesas redondas, como un plan familiar de fin de semana.
O público asistente pode gozar dos concertos e espectáculos programados, con algunhas das mellores bandas de Galicia, visitar o recinto feiral do encontro ou participar en obradoiros de fabricación de instrumentos con materiais de refugallo dirixidos á cativada.