Antonio Fraguas recibe unha homenaxe en Marín este domingo co espectáculo 'Amantes da Terra'
Por Redacción
Este domingo 14 de xullo, ás 21.30 horas no Parque Eguren de Marín vai levarse a cabo o espectáculo Amantes da Terra, unha produción da compañía Queiman e Pousa, na que se combina a música coa poesía, danzas e mostras de traxes tradicionais en homenaxe ao autor Antonio Fraguas, a quen este ano se dedicaba o Día das Letras Galegas.
Baseándose na súa frase "ser galeguista non é máis ca ser amante da nosa terra" desenvólvese unha montaxe na que participan máis dun cento de artistas. Desta forma, van darse cita a Banda de Unión de Lantaño, as Corais de Vales Mahía e Salvador de Camanzo; o Grupo de Gaitas e Baile Foula; o actor Bruxo Queiman, a cantante Andrea Pousa e a agrupación local Os Chaneiros de Marín, invitados especiais a este evento.
Este venres presentábase no Concello de Marín e os participantes explicaban que o espectáculo conta cunha demostración dos traxes tradicionais e traxes de gala, inspirados no libro de Antón Fraguas sobre esta temática.