'A Galicia insólita', de Antonio Fraguas, aparecerá este domingo no Teatro Principal con Os de Algures
Por Cristina Saiz & Anxo Lourido
A agrupación folclórica Os de Algures volve realizar unha montaxe multidisciplinar e con decenas de colaboracións. Este domingo 27 ao escenario do Teatro Principal subirán máis de 80 persoas entre intérpretes, músicos e bailaríns na sexta montaxe deste grupo e que, nesta ocasión, escenifica 'A Galicia Insólita. Tan lonxe e tan preto', baseada no libro de Antonio Fraguas, autor ao que este ano se dedicaba o Día das Letras Galegas.
Este venres, a concelleira de Cultura Carmen Fouces; a deputada desta área na Deputación, María Victoria Alonso e os integrantes de Os de Algures, José Luis Rodríguez e Antonio Vázquez, presentaban a estrea deste espectáculo, que conta coa participación da Aula Municipal de Teatro; Sete Espadelas; Tarabelo Teatro; Pandereteiras e Bailadores Sadeo; o coro de veteranos de A Xunqueira, Vinderel; e o Ballet Folclórico Galego.
O argumento céntrase na viaxe que un gaiteiro e un tamborileiro realizan ata San Andrés de Teixido. Durante o percorrido van atoparse, entre outras escenas, coa Santa Compaña, cun velorio onde se poderá ver o xogo do abellón ou cunha voda onde a pragmática real tentaba evitar os excesos dos xantares galegos nestas celebracións.
José Luis Rodríguez explicaba que a parte teatral adquire máis protagonismo nesta montaxe que volverá ser colorista e moi visual como xa sucedía nas anteriores obras sobre as figuras de Perfecto Feijoo, Casto Sampedro, Carlos Sobrino, Castelao ou dunha tecedeira galega. Sobre o escenario poderán verse, nesta ocasión, pezas de roupa e manteis con máis dun século de antigüidade cunha escenografía de máis de oito metros que recrea un cemiterio polo que aparecerá a Santa Compaña sempre levándose a alguén entre as figuras espectrais. Interpretación, música e baile mestúranse nunha obra que recolle o mellor da tradición e da cultura galega.
O espectáculo comezará este domingo 27 de outubro ás 20.30 horas no Teatro Principal con entrada libre ata completar o espazo do recinto.
Relacionadas:
-
Carballedo acolle unha exposición sobre a figura de Antonio Fraguas
Por Redacción |
-
A 'Galicia insólita' de Os de Algures pon en pé o Teatro Principal de Pontevedra
Por Redacción & Diego Torrado |
-
Exitosa estrea no Principal da montaxe etnográfica 'O soño da tecedeira' de Os de Algures
Por Diego Torrado & Redacción |
-
Casto Sampedro 'revive' por un día en Pontevedra
Por Redacción & Diego Torrado |
-
As cores dos traxes de Castelao brillan nun desfile-musical de Os de Algures
Por Diego Torrado |
-
Os cadros de Carlos Sobrino toman vida e recuperan a historia da Boa Vila
Por Redacción & Diego Torrado |
-
Os de Algures reivindican a faceta como gaiteiro de Perfecto Feijóo no 80 aniversario da súa morte
Por Alejandro Espiño |