Músicos galegos ofrecerán concertos por streaming para amenizar a corentena polo coronavirus
Por Alejandro Espiño
Que facemos durante a corentena? É unha pregunta que se fai moita xente tras o estado de alarma decretado no país ante o avance do coronavirus. Quedar na casa é necesario para evitar que se estenda o contaxio da enfermidade.
De aí que por todo país estean a agromar iniciativas que, desde o eido cultural, intentar concienciar á sociedade para que eviten saír da casa. Unha delas é Músicas de Sofá: Especial corentena, un festival que a través das redes sociais ofrecerá concertos en directo de artistas galegos.
O marinense Davide Salvado ou outros artistas de primeira liña como Abe Rábade, Najla Shami, Xisco Fernández, High Pawe ou Boj, entre outros, levarán a súa música dende os seus salóns aos sofás das casas do público.
O obxectivo desta iniciativa é que a música sexa un elemento transcendental para animar á xente a quedar nas súas casas e a non saír pola crise do coronavirus.
"Moitas das persoas que pertencen ao panorama musical galego quixéronse unir. É unha maneira tamén de usar as canles sociais para algo cultural e que merece a pena", explica Anais Barbier, unha das organizadoras desta iniciativa.
Afirma que moitos dos artistas que se sumaron a esta iniciativa tiveron que cancelar concertos que tiñan previstos para os próximos días e destaca que "se unha cousa nos move é o amor e as ganas que temos de facer música en directo e en galego".
Esta iniciativa tamén quere dar visibilidade ao feito de que, tras a cancelación dos concertos nas vindeiras semanas,"estaremos parados, sen traballar e sen ter ingresos", indica outro dos organizadores, Pedro Fariña, que recorda que "o peor é que non sabemos se esta situación vai tardar en volver á normalidade".
Os artistas e músicos están a confirmar a súa participación e a través das redes irán actualizando a información. O festival xa conta coa participación para mañá de High Paw, Davide Salvado e Najla Shami, que amenizarán a sesión vermú. Outros dos artistas que están pechando día e hora son Boj, Ugia Pedreira, Xisco Fernández e Abe Rábade, entre outros.
Relacionadas:
-
O Faiado Memoria contribúe a un confinamento entretido con acceso libre a documentais
Por Redacción |
-
Artistas de Pontevedra únense nun festival de música a través de Instagram
Por Alejandro Espiño |
-
Corentena, pero con ritmo: os veciños dun edificio de Loureiro Crespo anímanse para non caer no aburrimento
Por Sara Iglesias & Diego Torrado |
-
A solidariedade que trae o coronavirus: "Podemos hacerlo por ti"
Por Natalia Puga & Diego Torrado |
-
Rúas e prazas baleiras: os pontevedreses confínanse para loitar contra o coronavirus
Por Diego Torrado & Natalia Puga |
-
#NaCasa fronte o coronavirus: "Queda na casa, protéxete, axúdanos", pide o personal sanitario
Por Alejandro Espiño |