As citas do Cineclube con Jean Renoir adiántanse unha hora polo toque de queda
Por Redacción
As novas restricións impostas en Galicia afectan tamén ao Cineclube Pontevedra. Os responsables da súa programación víronse obrigados a adiantar unha hora o inicio das súas proxeccións. Ata novo aviso serán ás sete e media da tarde.
A billeteira do Teatro Principal abrirá tamén unha hora antes de cada proxección, dende as 18:30, para recoller as entradas para as dúas sesións programadas para este mes, que están dedicadas ao realizador francés Jean Renoir.
O novo horario estrearase este martes 19 de xaneiro con A grande ilusión, un drama belicista ambientado na Primeira Guerra Mundial e protagonizado por dous militares que viaxan nun avión derrubado polos alemáns e que acaban encarcerados.
Co grupo de compatriotas cos que coinciden na prisión organízanse para escavar un túnel que posibilite a súa fuxida.
Esta película foi censurada por Mussolini e por Goebbels, quen cualificou a Renoir como o inimigo cinematográfico número 1 da Alemaña nazi.
O martes día 26 vaise a proxectar a película As regras do xogo, vetada no seu día polo goberno de Francia e que é un estudo sobre os hábitos da burguesía ás portas da II Guerra Mundial, unha comedia de modais que agocha unha aceda crítica á alta sociedade francesa.
Nela, un adiñeirado aristócrata decide abandonar a súa amante para conservar o amor da súa esposa, cortexada ao tempo polo seu confidente e mais por un aviador. No transcurso dunha cacería, as intrigas amorosas mestúranse ata desembocar en traxedia.
As películas, como é habitual, emitiranse en versión orixinal (neste caso francés) e subtituladas.
Relacionadas:
-
Portugal protagoniza o mes de abril no Cineclube Pontevedra
Por Redacción |
-
Un marzo de viaxe por Siberia, Lesotho ou Israel da man do Cineclube Pontevedra
Por Alejandro Espiño |
-
O Cineclube despedirá 2020 con "Longa noite" de Eloy Enciso
Por Alejandro Espiño |
-
Películas de Michelangelo Antonioni, Angela Schanelec e Pedro Costa para o novembro do Cineclube
Por Alejandro Espiño |