O Concello de Cerdedo-Cotobade homenaxeará á escritora Xela Arias cunha actividade escolar colaborativa de recollida sonora de lendas e historias do municipio con motivo do Día das Letras Galegas.

Baixo o título "Contos ao teléfono Xela Arias", o alumnado dos centros educativos de infantil e primaria poderán enviar uns audios que realicen dos relatos que lle contaron os seus avós ou que coñezan de telos escoitado na casa. 

Para promover a participación, o Concello agasallará aos estudantes que participen enviando os audios ata o 31 de maio, data límite. Serán publicados nun podcast para que os coñeza toda a veciñanza.

Con esta actividade tamén pretenden xerar unha interacción interxeracional entre netos e avós en torno á celebración do Día das Letras Galegas e servirá tamén de canle para homenaxear a figura da escritora Xela Arias.