O Museo rexistra o mellor agosto da última década con case 42.000 visitantes
Por Redacción
Agosto foi un mes de récord no Museo de Pontevedra. O número de visitas no mes de agosto foi o máis alto dos últimos dez anos. Polas súas instalacións pasaron 41.862 persoas, unha cifra que supera en máis de 2.500 visitantes a anterior marca, fixada en agosto de 2011.
Para o director do museo pontevedrés, José Manuel Rey, estes datos supoñen unha satisfacción, xa que confirman o atractivo da institución tanto para turistas como para locais grazas ás exposicións e ás actividades programadas.
"Hai que ver agora como se porta este mes de setembro", engadiu Rey, que destacou que o día de maior afluencia foi o 5 de agosto, coincidindo coa inauguración da exposición Mulleres. Entre Renoir e Sorolla. Ademais, foi o mellor xullo en cinco anos con 22.591 visitantes.
En canto á procedencia dos visitantes individuais do mes de agosto, o 38% foi de procedencia galega -sobre todo da provincia de Pontevedra-, seguida de turistas estatais (44%), poñéndose á cabeza Madrid, Andalucía, Cataluña, Comunidade Valenciana e País Vasco.
No relativo aos visitantes internacionais, un 7%, houbo procedencias moi variadas, destacando por esta orde Francia, Portugal, Estados Unidos, Italia, Alemaña e Países Baixos.
Por exposicións e dende a súa apertura, a mostra de Novos Valores 2020 recibiu ata o de agora 11.048 visitantes dende o 8 de xullo; a de Libros Pop Up 6.277 persoas dende o 29 de xullo, e a de Mulleres. Entre Renoir e Sorolla 4.507 persoas dende o 5 de agosto
Ademais, durante os meses de verán intensificáronse as visitas guiadas ás exposicións permanentes que albergan os edificios Sarmiento e Castelao.
O percorrido, duns 50 minutos de duración, inclúe explicacións sobre o Tesouro de Caldas, a Virxe Branca, a xeración doente, a louza de Sargadelos, os renovadores e Castelao.
Tamén están en activo as visitas guiadas ás Ruínas de San Domingos, todos os xoves ás 12 da mañá.
Relacionadas:
-
Un curso no Edificio Castelao repasará a influencia da moda no universo artístico
Por Redacción |
-
Experimentación, abstracción e natureza na exposición de Luisa Valdés
Por Redacción |
-
Novos carteis lembran que nas Ruínas de San Domingos as fotos deben ser sen flash e sen pau selfie
Por Redacción |
-
Instalación-homenaxe no Museo polo centenario do pasamento do pintor Francisco Pradilla
Por Redacción |
-
O Museo de Pontevedra recupera as cifras de visitantes prepandemia
Por Redacción |
-
O Museo abre a exposición 'Mulleres. De Renoir a Sorolla' con medio cento de obras de artistas de renome
Por Mónica Patxot & Oskar Viéitez |