Concerto para recrear a vida e obra do fotógrafo José Suárez, creador da serie 'Mariñeiros'
Por Redacción
A concellería de Cultura de Bueu programa para este xoves 14 de abril, a partir das 21.00 horas, o concerto que leva por título 'José Suárez. Suite para unha vida'. Trátase dunha composición de Rafael Fernández coa que se quere homenaxear a vida e traxectoria profesional do fotógrafo José Suárez, recoñecido internacionalmente pola súa serie 'Mariñeiros', que ofrece imaxes do peirao de Massó, a praia da Banda do Río ou de Beluso.
Este espectáculo musical desenvolverase no auditorio do Centro Social do Mar con música e parte visual con referencias á presenza do fotógrafo na vila nos anos 30, grazas á colaboración do seu sobriño Xosé Luís Suárez Canal. A iniciativa forma parte do programa 'Bueu Gozosos Anos 30', coa idea de dignificar e lembrar a memoria dos anos previos ao golpe de estado do ano 1936 que terminou na guerra civil.
Guitarra eléctrica, arpa e teclado son os instrumentos nos que se basea a obra que se interpretará en directo con catro partes relacionadas coa vida do creador. A música ofrecerá atmosferas e mesmo pasaxes descritivas inspiradas nas fotografías e no momento vital que José Suárez experimentou en Bueu e na comarca do Morrazo durante a súa estancia no século XX. Leranse textos de Suárez e doutros intelectuais coo Branco Amor ou Unamuno.
A entrada a este evento é libre ata completar a capacidade do recinto, segundo informan desde o Concello de Bueu.