Nos anos 1980 e 1981, Pontevedra convertíase en Pueblanueva del Conde, a vila galega que o escritor Gonzalo Torrente Ballester creaba como escenario das historias de 'Los gozos y las sombras'. Durante seis meses, algúns dos intérpretes máis coñecidos do panorama artístico español de entón atopábanse polas rúas do centro histórico pontevedrés: Eusebio Poncela, Amparo Rivelles, Carlos Larrañaga, Rosalía Dans e a mítica Charo López, que recreaba a figura de Clara Aldán.

A actriz salmantina volverá a Pontevedra o próximo 15 de decembro. Será a protagonista dun recital que se desenvolverá antes da esperada inauguración de 'A cidade é a pegada', unha exposición comisariada por Alfredo Olmedo, que recollerá case 500 pezas para reflexionar sobre o significado de pertencer á boa vila.

A sala Personaxes, comisariada por Milagros Bará, ofrecerá máis de setenta pezas. Poderán verse fotografías, debuxos, esculturas e obxectos curiosos procedentes de diferentes institucións e arquivos como o da familia Riestra, de Manuel Suárez ou de diversas coleccións familiares.

Haberá outras partes dentro desta gran mostra como Río, comisariada por Eduardo Outeiro; Infancia, por Norberto Olmedo e Fernando Suárez; Arquitectura, correspondente a Naan Arquitectos; e con Patricia Dopico como responsable do deseño editorial. 

Esta mostra elabórase polo Concello de Pontevedra, a través da concellería de Cultura que dirixe Carme Fouces, que desde hai un ano traballa para presentar un proxecto expositivo inédito, que se poderá visitar desde o 15 de decembro ata o 22 de marzo no Pazo da Cultura.