"A cidade é a pegada", a exposición que ofrece un "poema visual" sobre a Pontevedra pasada, presente e futura
Ata o próximo 22 de marzo, a sala de exposicións do Pazo da Cultura vestirá as súas mellores galas para acoller a mostra "A cidade é a pegada", que segundo os seus responsables é un "poema visual" sobre a cidade de Pontevedra e os seus habitantes.
A inauguración oficial será esta mesma tarde, ás 20:30 horas. Previamente, a 'madriña' desta exposición, a actriz Charo López, ofrecerá un recital poético con fragmentos de Los gozos y las sombras, cuxa adaptación a televisión -con ela como protagonista- rodouse na Boa Vila.
Alfredo Olmedo, comisario da exposición, destacou o "clima dramático" que se buscou para ambientar esta mostra, de forma que o público "concentre a súa vista nas pezas". A iso axuda a nova iluminación da sala, completamente renovada.
"Aquí conviven imaxes do pasado, do presente e do futuro", resumiu Olmedo, que explicou a intención de facer "algo moito máis dinámico" que outras mostras similares, con vídeos ou sons cos que os visitantes poden interactuar.
Todo iso, engadiu o responsable da mostra, utilizando unha "ironía sutil e elegante", un enfoque cinematográfico e a visión da infancia para relacionar todas as pezas que se expoñen, preto de 500 entre fotografías, pinturas ou esculturas.
"A cidade é a pegada" distribúe todo o seu contido en catro áreas: o río Lérez, personaxes de Pontevedra, a infancia e arquitectura e urbanismo, repartidas por toda a sala de exposicións.
A primeira, situada á entrada do recinto -polo cubo exterior do Pazo-, é a dedicada ao río e que, segundo Alfredo Olmedo, "é un canto á natureza e a un lugar privilexiado".
Nela, entre outras pezas, expóñense dúas canoas históricas cedidas polo Club Naval, pinturas ao óleo sobre a vida fluvial que proceden do Museo de Pontevedra, os planos orixinais da ponte da Barca, fotografías antigas ou un herbario con especies autóctonas do Lérez.
Trinta e cinco homes e mulleres que "pola súa forma de ser, de actuar ou de facer" deixaron en Pontevedra unha "pegada indeleble" reúnense no segundo dos espazos, dedicado a personaxes da cidade e que estivo coordinado pola escritora Milagros Bará.
Son persoas que, segundo esta responsable da mostra, "cambiaron o rumbo da nosa historia e que aínda ecoan na memoria colectiva de Pontevedra", procedentes da literatura, a empresa, a política, as ciencias, a arte ou o deporte, entre outras áreas.
A infancia ocupa a terceira das salas, ofrecendo unhas oitenta fotografas que rexistran "momentos singulares" na cidade, cos xogos e o deporte como nexo de unión, que supoñen "tesouros moi íntimos, espontáneos ou clandestinos", sinalou Norberto Olmedo.
A exposición termina co espazo dedicado á arquitectura e o urbanismo, coordinado por Vicente Pillado e Alberto Reiriz de NAN Arquitectos, que mostra "de onde vimos e cal foi o percorrido ata chegar aquí", desde o punto de vista de concepción da cidade.
Alí móstrase planos e maquetas de diversos espazos, moitos deles descoñecidos ata o de agora, entre eles o pavillón de deportes, o mercado de abastos, o depósito de auga de San Amaro, os pavillóns militares de Campolongo ou a barriada de San Antoniño.
Este espazo complétase cun panel que reúne fotografías de elementos urbanísticos destacados da cidade ou imaxes cedidas por Diario de Pontevedra que mostran a evolución que tivo Pontevedra desde o punto de vista urbanístico.
Relacionadas:
-
Editan un catálogo para gozar da exposición "A cidade é a pegada" desde casa
Por Redacción |
-
"A cidade é a pegada" acollerá visitas guiadas para todos os públicos
Por Álvaro Arosa Barco |
-
Charo López emociona no Pazo da Cultura poñendo voz a versos de Rosalía de Castro, Lorca e Machado
Por Anxo Lourido |
-
'A memoria das mulleres' promociona catro podcast para disfrutar paseando pola cidade
Por Redacción |
-
Charo López volverá en febreiro a Pontevedra co recital "Verso a verso"
Por Redacción |
-
A mellor cifra anual de visitantes ao Museo de Pontevedra da última década
Por Redacción |
-
Un mapa permitirá coñecer a pegada da Memoria das Mulleres nas rúas da cidade
Por Anxo Lourido |
-
Charo López regresa a Pontevedra como 'madriña' da exposición "A cidade é a pegada"
Por Redacción & Mónica Patxot |
-
A mirada da infancia, fío condutor da exposición "A cidade é a pegada"
Por Alejandro Espiño |
-
Charo López, protagonista de 'Los gozos y las sombras', retorna a Pontevedra para inaugurar ‘A cidade é a pegada’
Por Redacción |
-
Pontevedra prepara unha exposición sobre a pegada mutua entre a cidade e a súa xente
Por Alejandro Espiño |