O Campionato Ibérico de raids de orientación reúne durante a fin de semana máis de 500 deportistas
Por Diego Espiño
Ata seis municipios da provincia verán pasar aos participantes da quinta edición do PontevedRaid de orientación organizado polo Club Montañeiros Pontevedra, convertido este ano en Campionato Ibérico.
Máis de 500 deportistas daranse cita na proba, que arranca o sábado ás 10:00 horas no Pontillón do Castro para afrontar 175 quilómetros de percorrido por Pontevedra, Poio, Marín, Bueu, Cangas e Moaña.
Os participantes deberán afrontar diversos sectores con disciplinas como o BTT, carreira a pé, kaiak, natación, rápel ou escalada.
Trátase "da primeira das tres probas apalabradas coa Federación Española", segundo recoñeceu o concelleiro de Deportes Agustín Fernández, xa que a cidade de Lérez acollerá en 2015 o Campionato Ibérico de orientación a pé e en 2016, con case total probabilidade, o Campionato de España de Orientación.
O sábado a competición contará cunha proba nocturna, ata a 1:00 da madrugada, que terán saída en Donón (Cangas), mentres o domingo ás 9:00 horas se dará a saída á última etapa, con saída de novo no Pontillón do Castro e que achegará aos competidores ao centro da cidade e a Illa das Esculturas.
Por primeira vez o PontevedRaid contará ademais con seguimento en directo por GPS a través da web www.tracktherace.com.
Relacionadas:
-
Primeiros pasos na organización do Nacional de orientación, que reunirá en marzo a 1.500 deportistas
Por Diego Espiño |
-
O Camelback-Silva proclámase campión ibérico de raids na PontevedRAID 2014
Por Noel Queipo |
-
Pontevedra, centro ibérico dos deportes de orientación durante os próximos tres anos
Por Redacción |