Un mal comezo de partido deixa sen opcións o Cisne en León
Por Redacción
O Universidade de León-Ademar impúxose con comodidade ao BM Cisne por 33-26, co que o conxunto leonés logra a súa sexta vitoria consecutiva que o consolida na zona alta da clasificación, mentres os pontevedreses se afastan dos postos de privilexio quedando na zona morna da táboa.
Tras o 1-2 inicial, o cadro leonés tomou a dianteira imprimindo velocidade ao balón e logrando poñerse por diante ata un 6-3 que obrigóu a Milucho Pintos a solicitar tempo morto para intentar cambiar a dinámica, pero foi en van, pois a base de defensa e contraataques o Universidade rompeu definitivamente o partido xa na primeira parte, para irse ao descanso cun claro 19-10, que deixaba practicamente sentenciado o partido.
Na segunda parte, a relaxación fixo baixar as prestacións dos leoneses, especialmente en defensa, o que permitiu ao Cisne lograr en só 15 minutos os mesmos goles que en toda a primeira metade. Os pontevedreses intentaron meterse no partido cunha defensa mixta sobre Alberto Molina, pero nin os 11 goles do seu extremo Pablo Domínguez foron suficientes para reducir a desvantaxe por debaixo dos 7 goles (33-26) con que rematou o choque.
UNIVERSIDADE DE LEÿN ADEMAR (33): Méndez, Canales, Mario López (6), Jorajuria, Dani Martínez (4), Pichel (6), Rodrigo, Molina (1), Goñi (4), Viñuela (1), Mario Álvarez (4), Jadim (1), Borja (5) e Grañeras (1).
B.M. CISNE (26): Lafuente, Pablo Galán, Bruno Montesinos, Pablo Domínguez (11), Pablo Picallo, Andrés Sánchez (1), Martín Iglesias (3), Alberto Casares (4), Javier Vázquez, Eduardo Covelo, Miguel Simón (1), Pachi Dacosta (2), Adrián Freiría (3) e Dani Puente (1).
Árbitros: Jesús Álvarez e José Carlos Friera. Excluíron por dous minutos a: Mario López, Goñi, Mario Álvarez, Jadim, Martín Iglesias, Pachi Dacosta, Adrián Freiría e Dani Puente.
MARCADOR (cada cinco minutos): 1-2, 5-3, 9-4, 13-6, 15-7, 19-10 (descanso), 22-13, 24-16, 28-20, 30-22, 32-23 e 33-26 (final).
Incidencias: Pavillón Universitario Hansi Rodríguez, de León. Pouco máis de cen espectadores.