A SD Teucro solicitará entrar en concurso de acredores nas próximas horas
Por Diego Espiño
O segundo clube de balonmán máis antigo de España, a Sociedade Deportiva Teucro, encara a fase determinante da súa búsqueda de viabilidade, solicitando de xeito oficial no Xulgado do Mercantil a súa entrada en concurso abreviado de acredores.
Farao de xeito inminente tras a adhesión ao convenio previo, nas últimas horas, dun dos principais acredores da entidade, Ricardo Tilve. Coa inclusión de dúas das súas empresas, a cifra de adscritos ao documento formulado polo Teucro supera o 30% da débeda total do clube, que ascende a 1.610.000 euros.
O 51% dos acredores deberá aceptar reducir a débeda á metade
Para que o proceso concursal poida chegar a bo termo, o 51% dos acredores deberá aceptar reducir a débeda á metade, aprazando a cinco anos o pagamento do resto das cantidades pendentes.
A directiva do Teucro negocia agora coa firma de autocares Monbús. Se a empresa de Raúl López aceptase os termos do futuro convenio, xa se superaría a cifra necesaria para que o proceso xudicial resulte positivo e colocar así a entidade con perspectivas de viabilidade.
O presidente do equipo, Carlos García Alén, confirmou a PontevedraViva a noticia, "estamos ganando casi un mes a los plazos previstos. La intención es poder acceder a las subvenciones lo antes posible".