Charles dá o Luis Otero ao Celta (2-4) ante un Pontevedra que fai unha brillante segunda parte
Por Ramiro Espiño
Nin as ausencias dos seus internacionais, nin os numerosos cambios que o Toto Berizzo introduciu no equipo inicial, dando entrada aos xogadores menos habituais acompañados de tres homes do filial, foron obstáculo para que o Celta deixase claro dende os primeiros compases que non viñera a pasearse, e si a disputar un partido serio e impoñer a lóxica superioridade sobre o cadro granate que marca a tremenda diferenza de categorías entre ambos os dous.
Os de Luisito intentárono, buscando a área contraria con decisión, pero con pouca fortuna. E iso a pesar de que moi pronto encaixarían dous goles nas dúas primeiras chegadas viguesas. Como non hai peor cuña que a da mesma madeira, sería un home criado en boa parte en Pasarón e idolatrado pola afección local, quen se encargara de abrir diferenzas. Charles aproveitou un pase en longo para, tras rexeitar Lloves o seu primeiro remate, abrir o marcador ao segundo intento. Logo volvería marcar, apenas tres minutos máis tarde, rematando un centro dende a liña de fondo de Hugo Mallo.
Augusto puido facer o terceiro pouco despois, pero encontrouse co pé de Lloves que o evitou. A rapidez do campo como consecuencia da chuvia, era un aliado máis da superioridade técnica dos celestes (nesta ocasión de verde, por esas razóns pouco comprensibles para os afeccionados máis puristas, de pretender vender máis camisetas). Iso non evitou que o equipo local tivese algunha chegada interesante, pero fallando no último pase para deixar en posición de vantaxe o dianteiro.
Pero o que debía ser unha festa entre dous equipos veciños estragouse no minuto 42 de partido cando Hugo Mallo comete unha clara falta sobre Jorge. O árbitro non pita nada. Jorge encárase. Hugo Mallo replícalle e voan os puños de ambos os dous en dirección á cara do adversario. Saltan os compoñentes de ambos os dous bancos para intentar tranquilizar, pero xa estaba liada. O colexiado manda a ambos os dous a reflexionar sobre o que nunca se debe facer sobre o campo e menos nun amigable.
Ben fose polo desagradable incidente ou polos cinco cambios que Luisito realizou no descanso, o certo é que a segunda parte ofreceu dous equipos cos papeis invertidos. O Pontevedra creceuse e puxo en apuros a vigueses. Pablo Carnero recortaba distancias, resolvendo ben ante Rubén Blanco. O árbitro, desacertado toda a noite, ignoraba un claro penalti de David Goldar sobre Pablo, e o poste evitaba o empate granate, nunha gran xogada culminada con remate de Mouriño.
Para entón o campo estaba cada vez máis pesado e con moita auga, pero o ritmo non baixaba, deixando unha segunda parte moito máis atractiva e movida. O Pontevedra merecera máis, pero a calidade dos céltico impoñeríase de novo en curto espazo de tempo e nas dúas primeiras chegadas con perigo. De novo Charles marcaba para sentenciar, rematando a pracer un centro dende a liña de fondo, e logo Santi Mina protagonizaba unha bonita xogada individual para plantarse ante Lloves e batelo con tranquilidade.
No medio de ambos os dous o Pontevedra intentouno ata en tres ocasións, sen conseguilo. Os granates a pesar do marcador buscaban con decisión o marco. Nunha desas accións o xuvenil Agus encarou con descaro, superando a David Goldar, que o derruba por detrás ao bordo da área. A acción cústalle ao celeste a tarxeta vermella directa.
Aínda habería tempo para o golazo da noite. Fíxoo Pablo Carnero nunha espectacular chilena de costas a portaría, tras excelente túa-miña con Jacobo. Foi o xusto premio a un Pontevedra que na segunda parte atuou e por fases mesmo superou o Celta, deixando unha excelente imaxe.
PONTEVEDRA CF (2): Lloves; Adrián (Agus. min. 76), Pablo, Capi (Campillo, min. 46), Anxo (Jacobo, min. 60); Kevin Presa (Mouriño, min. 46), Pedro García (Iago, min. 82); Benja (Tubo, min. 46), Tomás (Pablo Carnero, min. 46), Centrón (David Feito, min. 46); e Jorge.
REAL CLUB CELTA DE VIGO (4): Rubén Blanco; David Soto, Sergi Gómez (Samuel, min. 46), Fontás, Hugo Mallo; David Goldar, Borja; Augusto (Jordan, min. 73), Álex López, Santi Mina; e Charles (Julio Delgado, min. 82).
Árbitro: Alejandro Muñiz (Pontevedra), auxiliado nas bandas por Diego Sánchez e Alejandro Castro. Expulsou con vermello directo a Jorge e Hugo Mallo (minuto 42) por agresión mutua, e a David Goldar (minuto 78) por cortar en falta unha ocasión manifesta de gol. Amoestou a Adrián, Lloves e Campillo, polo Pontevedra.
Goles: (0-1) Minuto 18: Charles. (0-2) Minuto 21: Charles. (1-2) Minuto 53: Pablo Carnero. (1-3) Minuto 71: Charles. (1-4) Minuto 75: Santi Mina. (2-4) Minuto 84: Pablo Carnero.
Incidencias: Estadio Municipal de Pasarón (Pontevedra). LV Edición do Trofeo Luis Otero. Uns 600 espectadores. Un amplo sector das Penas do Pontevedra renunciaron a asistir o partido en protesta pola decisión do Consello de Administración de cobrar un suplemento aos socios granates. Ao finalizar o partido a Deputada de deportes da Deputación Provincial, Ana Isabel Vázquez, fixo entrega do trofeo ao capitán de R.C. Celta.