Marín puxo o broche á Copa Galicia de Descenso BTT
Por Redacción
A quinta edición do descenso organizado polo CD Kamikazes de Marín serviu para baixar o pano á tempada na Copa Galicia de Descenso BTT.
O habitual pelotón autonómico da especialidade, con máis de 70 deportistas, estivo presente na competición celebrada un ano máis na contorna do Lago de Castiñeiras, nun trazado mellorado con respecto a anteriores edicións coa intención de poder aumentar os ritmos de baixada dos participantes.
Jorge Panizo (Bici Verde) fíxose por vez primeira esta tempada coa vitoria absoluta. Co seu rexistro de 02:32.6 na manga final avantaxou en máis de catro segundos a Kevin Méndez (Pulpeiros), quen se fixo co triunfo final na Copa na categoría sub-23.
Á conclusión da carreira impuxéronse as camisolas definitivas dos mellores ciclistas na Copa Galicia 2018 de descenso, que obtiveron: Manuel Pellón en elite masculina, Uxía Álvarez en categoría feminina, Kevin Méndez (sub-23); Víctor Mariño (junior), Diego Álvarez (cadete), Borja Comesaña (M30); José Montenegro (M40) e Manuel Paz (M50).