O Cisne tira de xuventude para afrontar unha nova tempada na División de Honra Prata
Por Alejandro Espiño
Coa incorporación de catro xuvenís ao primeiro plantel, Álvaro Preciado, José Leiras, Daniel Fernández e Bruno Vázquez, o Cisne dá por pechado o seu equipo. Salvo fichaxe de última hora, Javier Fernández "Jabato" xa coñece aos dezaseis homes cos que o conxunto pontevedrés pelexará un ano máis pola permanencia na División de Honra Prata.
Nunha rolda de prensa, que tivo lugar no hotel Galicia Palace, o presidente do club, Santi Picallo, presentou aos catro novos integrantes do equipo que, durante a pasada tempada, xa adestraron co primeiro equipo e mesmo chegaron a debutar en partido oficial.
Ademais, formaron parte do equipo que logrou a histórica medalla de bronce lograda polo Cisne no último campionato de España xuvenil de balonmán.
Esta aposta pola canteira, segundo explicou Picallo, é a "vocación" do club pontevedrés, cuxo primeiro equipo debe verse "beneficiado" dese traballo coas categorías inferiores, especialmente cando dela saen xogadores de tanta calidade técnica.
Daniel Fernández ocupará a praza de gardameta que deixou libre Pablo Galán tras a súa fichaxe polo Cangas. O mozo, formado na canteira do Octavio, "está entre los mejores porteros de España", destacou o presidente do Cisne.
Pola súa banda, Bruno Vázquez -lateral dereito- e José Leiras -extremo dereito- son xogadores versátiles que poden intercambiar as súas posicións. O primeiro deles "va de la mano" na súa traxectoria co gardameta, mentres que Leiras é un xogador "muy potente" que chegou ao Cisne a pasada tempada procedente do Seis do Nadal.
A cuarta incorporación, a do central Álvaro Preciado é o exemplo claro da aposta do Cisne pola canteira. Leva nas categorías inferiores do club desde os seis anos e chegou ao primeiro equipo "en el que ya está perfectamente integrado" tras debutar a pasada tempada, segundo Santi Picallo, "con trabajo, esfuerzo y dedicación".
Ademais, Picallo confirmou que outros tres xogadores xuvenís farán a pretemporada co primeiro equipo. Trátase de Roque Arias, Dani López e Daniel Gonçalves, aínda que é probable que algún deles termine sendo cedido a outro club de Primeira Nacional para disputar minutos e favorecer a súa formación.
SEGUNDO ADESTRADOR
O Cisne presentou tamén a Anxo Corbillón como o segundo adestrador do equipo. Con el, o club busca reforzar a súa estrutura técnica e "aumentar el nivel de exigencia a nuestros jugadores". Trátase dun home que "conoce bien el club" tras xogar no equipo durante catro tempadas. Procede do Seis do Nadal feminino.
Relacionadas:
-
O Cisne ponse en marcha con 15 xogadores e a "misma ilusión de siempre"
Por Diego Espiño & Mónica Patxot |
-
O Cisne iniciará a liga de División de Honra Prata o 15 de setembro en Zarautz
Por Redacción |
-
Jabato seguirá unha tempada máis á fronte do Cisne
Por Redacción |
-
Álvaro Preciado, convocado por España para o Europeo Junior de balonmán
Por Redacción |
-
Os xuvenís do Cisne tiran de épica para colgar o bronce no campionato de España
Por Redacción |