O Pontevedra traspasa a David Castro ao Valencia
Por Manu Otero
O Pontevedra iniciou este luns os adestramentos de preparación para a próxima campaña en Pasarón. Pero entre os trinta xogadores que se puxeron ás ordes de Luismi non estaba unha das revelacións do último curso.
O lateral esquerdo David Castro ten pechado a súa fichaxe polo Valencia para xogar no filial de Segunda B, o Valencia Mestalla. Así o anunciou en rolda de prensa a presidenta do Pontevedra, Lupe Murillo, acompañada polo propio xogador e o director deportivo da entidade, Roberto Feáns.
Antes de que David Castro se despedira con emoción de todos os membros do club, con mención especial para os seus compañeiros, a presidenta e o director deportivo e a afección; Murillo explicou que o Pontevedra e o Valencia alcanzaran un acordo para o traspaso do lateral.
A pesar de que as cifras da operación non transcenderon e que a propia presidenta alegou que non se trata dunha boa noticia porque o Pontevedra non quería perdelo, o propio Castro afirmou que se trata "dun acordo bo para para todos".
"Teño moito que agradecer ao Pontevedra, fáiseme moi duro marchar", dixo contendo as bágoas o lateral que, tras ser repescado do Céltiga, pasou as tres últimas campañas defendendo a camiseta granate.
Ademais da suma que o Valencia pague ao Pontevedra polo traspaso, o conxunto de Pasarón incluíu unha serie de cláusulas no acordo que, en función do rendemento do xogador en Mestalla, poderían incrementar a cifra do traspaso. En función dos minutos xogados, se logra o ascenso de categoría ou consegue debutar co primeiro equipo, o montante global da operación veríase incrementado.
Con todo, coa marcha do lateral o Pontevedra terá que buscar un recambio de garantías no mercado. Con todas as fichas sénior asignadas, a única opción para reforzar a defensa pasa por contratar a un xogador sub 23 ou dar algunha baixa, algo que desde o club, en principio, non contemplan.
Relacionadas:
-
O Pontevedra preséntase ante os seus afeccionados como "un equipo ambicioso"
Por Diego Espiño & Diego Torrado |
-
O porteiro andaluz Brian Jaén, sexta fichaxe do Pontevedra
Por Diego Espiño |
-
O lateral esquerdo Álvaro Naveira únese ao Pontevedra por dous anos
Por Sofía Lorenzo |
-
Álvaro Bustos queda en Pontevedra durante un ano máis
Por Sofía Lorenzo |
-
O Pontevedra CF recibe a Uzochukwu Ogumka
Por Sofía Lorenzo |
-
Pol Bueso, ansioso por vestir de granate: "Sé cómo estoy físicamente y la cuerda que me queda"
Por Diego Espiño |
-
N'Diaye xa pensa en clave granate prometendo "trabajo, intensidad y un buen trato de balón"
Por Diego Espiño |