Pablo Dapena repite podio no Challenge de Praga
Por Sofía Lorenzo
Despois de varias semanas de parón, Praga foi, durante este sábado, o campo de competición de Pablo Dapena na que foi a súa primeira proba do segundo bloque da tempada. Nesta ocasión, no Challenge da capital checa, ao que o pontevedrés chegaba con problemas. Durante os adestramentos sufriu unha torcedura de nocello ademais dunha caída da bicicleta, o que, con todo, non pareceu afectarlle durante a carreira.
Dapena viaxou a Praga co listón alto despois da segunda posición do ano pasado, cruzando a liña de meta só por detrás de Javi Gómez Noya, quen, non acudiu á proba de media distancia desta fin de semana. E cumpriu coas expectativas conseguindo subirse ao podio.
O primeiro tramo a nado foi para el, que conseguiu saír da auga en primeira praza con 13 segundos de vantaxe sobre o grupo formado por sete homes, os favoritos da competición. Sen embargo, despois da primeira transición, Dapena comezou a perder terreo, ata colocarse na novena posición, chegando ao segundo cambio xunto ao alemán Frederik Funk a 5:30 do primeiro. Florian Angert, Pieter Heemeryck, Thomas Steger e Thomas Davis foron os mellores durante o segundo sector.
Os 21 quilómetros de carreira a pé comezaron con Angert sendo consciente da súa ampla vantaxe sobre o resto e co pontevedrés máis forte que os seus rivais. Despois do quilómetro e medio, no que Dapena xa conseguira remontar posicións, colocándose cuarto, sacou garra e meteuse nas posicións ao podio, con Angert e Heemeryck por diante.
Finalmente, o galego mantivo o nivel e, estirando a súa enerxía ata o final, cruzou a liña de meta en terceira posición cun tempo de 3:59:04.2.
Agora toca seguir coa segunda parte da tempada con vistas ao seu obxectivo: o Mundial 70.3, que se desenvolverá o próximo mes de setembro en Niza.
Consulta os tempos completos de Pablo Dapena no Challenge de Praga.
Relacionadas:
-
Ser top 10 no Ironman 70.3 de Niza, último gran reto da tempada para Pablo Dapena
Por Manu Otero |
-
Praga, novo capítulo no gafe de Pablo Dapena coas súas viaxes
Por Diego Espiño |
-
Pablo Dapena e Saleta Castro axudan a Galicia a subir ao podio do Nacional por Autonomías
Por Diego Espiño |
-
Gómez Noya e Dapena soben ao segundo e terceiro chanzo do podio do Europeo Ironman 70.3
Por Sofía Lorenzo |
-
Pablo Dapena e Javi Gómez Noya apúntanse ao Europeo Ironman 70.3
Por Diego Espiño |