A Federación suspende as dúas próximas xornadas da Segunda B e categorías inferiores polo coronavirus
Por Manu Otero
A presión exercida polos clubs e o incesante incremento de positivos por coronavirus en todo o país fixeron cambiar de opinión á Real Federación Española de Fütbol. Se este martes o Consello Superior de Deportes decretaba a disputa dos partidos das competicións profesionais e non profesionais de ámbito nacional e internacional a porta pechada, este mércores é a RFEF a que amplía as restricións e decide suspender polo menos a disputa das dúas próximas xornadas das competicións de fútbol e fútbol sala non profesional.
Esta decisión, xa ratificada pola Comisión Delegada, afecta directamente ao Pontevedra CF e ao Poio Pescamar, clubs que xa expresaran o seu desexo de suspender a competición por precaución e por non privar aos seus afeccionados de asistir aos partidos para apoiar ao seu equipo.
No comunicado emitido pola Comisión de Seguimento da RFEF explican as razóns deste drástico cambio de plans. "Debemos garantir a homoxeneidade das competicións de fútbol, a integridade e o necesario equilibrio competitivo. Dado que se constatou que existe imposibilidade real de disputar partidos de fútbol e desenvolver adestramentos en determinadas cidades (...) un conxunto de medidas entre as que se inclúen: que todos os partidos das Competicións de Fútbol e Fútbol sala de Ámbito Estatal non profesionais quedarán suspendidas a partir de hoxe mesmo polo prazo de dúas semanas".
Ademais, recomendan a todas as federacións territoriais que adopten a decisión que consideren máis oportuna, aínda que aconsellan a suspensión de todos os partidos durante o prazo de dúas semanas.
Tan pronto como recibiu a notificación da RFEF, a Federación Galega de Fútbol acordou que "toda a competición autonómica de fútbol, fútbol sala e fútbol gaélico tamén queda suspendida durante ese mesmo prazo de dúas semanas".
O VESTIARIO GRANATE, PREOCUPADO POLO VIRUS
Despois do comunicado emitido polo Pontevedra no que solicitaba a suspensión dos partidos, foi o propio capitán do primeiro equipo quen, en nome de todo o vestiario, expresou a preocupación polo avance da enfermidade. "Na vida o que máis importa é a saúde. Nós non podemos arriscar a saúde de ninguén. Nin a nosa, nin a da xente que traballa durante o partido ou que asiste ao partido. É de lóxica, se non se pode disputar suspéndese e búscase unha solución", sostiña Edu Sousa, minutos antes do anuncio da RFEF polo que se suspendían as dúas próximas xornadas.
"Xogar a porta pechada non nos gusta. Primeiro porque é o noso campo e porque a afección aléntanos e forma parte do espectáculo. Pero non podemos arriscar que a xente se contaxie por un evento deportivo", engadiu o porteiro.
Neste sentido, o capitán do Pontevedra reclama a adopción de medidas "porque é unha enfermidade que se está poñendo seria. Entendo que os clubs queiran que os partidos se suspendan e que sexa prolongada ata que todo se normalice un pouco", argumenta.
Con todo, como portavoz do club asume que deben "acatar as decisións dos seus superiores. Se nos mandan xogar teremos que xogar porque se non perdemos o partido", remata, ao mesmo tempo que asegura a concentración de todo o equipo na competición. "Somos capaces de diferenciar o que é o coronavirus co que é adestrar. Estamos preparando o partido coma se se fose a xogar", concluíu.
Ademais, os hábitos do vestiario tamén están a cambiar por esta epidemia. "Estamos todos sans e concienciados coas medidas preventivas, de ter unha hixiene máis estrita do normal", rematou.
Relacionadas:
-
A comunidade granate mobilízase para confeccionar un arquivo dos momentos de gloria do Pontevedra
Por Manu Otero |
-
A Federación Española adiantará 4 millóns aos clubs de Segunda B, Terceira e Fútbol Sala
Por Redacción |
-
A Federación Española de Fútbol amplía a suspensión das competicións e non pon data para o seu regreso
Por Redacción |
-
As federacións Española e Galega de Fútbol apostan por completar a tempada aínda que sexa máis aló do 30 de xuño
Por Redacción |
-
Raúl Jiménez deixa de ser adestrador do Poio Pescamar
Por Almu Dapena |
-
O Pontevedra cancela tamén os adestramentos do primeiro equipo
Por Manu Otero |
-
O Pontevedra mantén os adestramentos do primeiro equipo a pesar da alerta sanitaria
Por Manu Otero |
-
O coronavirus deixa no aire os primeiros selectivos para os Xogos Olímpicos
Por Manu Otero | Creada e actualizada
-
O baloncesto súmase aos aprazamentos polo coronavirus: nin LEB Ouro, nin Liga Feminina 2, nin base
Por Redacción |
-
A Xunta suspende o deporte escolar e recomenda o aprazamento do federado
Por Redacción | Creada e actualizada
-
O balonmán español cede tamén ao coronavirus e suspende as dúas próximas xornadas
Por Manu Otero |
-
A suspensión de eventos polo coronavirus preocupa á hostelería de Pontevedra ante a cancelación de reservas
Por Boris Rodríguez Pintos & Anxo Lourido |
-
O Pontevedra pide a suspensión da liga durante quince días e rexeita xogar a porta pechada
Por Manu Otero |
-
O Teucro pide a suspensión da competición polo caso de coronavirus no plantel do Málaga
Por Manu Otero | Creada e actualizada
-
Os partidos do Pontevedra, Cisne, Teucro, Arxil, Poio e Peixe, a porta pechada por orde do CSD
Por Manu Otero | Creada e actualizada