Marín reabre a pista de atletismo de San Pedro e as canchas de tenis
Por Redacción
A entrada na fase 2 da desescalada traerá importantes cambios para os deportistas de Marín, máis aló dos establecidos a nivel xenérico polo Goberno.
O Concello anunciou a apertura das pistas municipais de atletismo de San Pedro, o que facilitará o adestramento de atletas e outros deportistas federados.
Segundo informou o concelleiro de Deportes, Antonio Traba, poderán acceder ás instalacións todos os deportistas profesionais, de alto rendemento e federados, non necesariamente atletas, cun máximo de 6 persoas á vez na pista e sen a posibilidade de utilizar os vestiarios. Será necesario ademais pedir cita previa.
Por outra banda, neste caso para goce de toda a cidadanía, procedeuse á apertura das pistas de tenis, ás que se poderá acceder tamén mediante cita previa cun máximo de dous xogadores por quenda, é dicir, sen posibilidade de xogar en modalidade de dobres.
Para ambas as dúas instalacións a reserva pode formalizarse no teléfono 610 101 886, en horario de mañá.
O que de momento permanecerá pechado en Marín serán os pavillóns, segundo confirmou o goberno local.