Javi Llorente, nun partido do Peixe Galego en Copa Galicia

Javi Llorente asume a dirección técnica do Peixe Galego

Por Redacción
Mércores 29 de Xullo, 2020 ás 08:16 do Mércores 29 de Xullo, 2020

O Peixe Galego quere retomar impulso tras o duro golpe que supuxo a súa non inscrición na liga LEB Ouro e o seu consecuente descenso varias categorías, ao deixarlle a Federación sen dereito deportivo nas categorías nacionais.

Para iso, a entidade marinense confiou o seu proxecto a Javier Llorente, o ata hai uns meses adestrador do primeiro equipo tras oito anos no cargo.

Segundo confirmou o club 'peixe', Llorente será o seu novo director técnico, ademais de xefe da canteira e coordinador da base. Nas súas mans por tanto estará a planificación deportiva do Peixe Galego, dando un paso á fronte tras o respiro que supuxo a súa saída do banco da Raña "por motivos persoais e familiares", alegou o pasado mes de febreiro.

Javi Llorente substituirá no cargo a Julián Bravo, que se desvincula do club despois de 10 anos.

Julián foi "unha figura clave no desenvolvemento da nosa canteira nos últimos anos", sinala o Peixe, que destaca o seu "traballo impecable avalado por unha forma de ser e unha ética de traballo e dedicación intachable". A substitución prodúcese, alega o club, por "motivos persoais que levan a Julián a unha desvinculación temporal co basket".