As dúas Antías da EP Cidade de Pontevedra desembarcan en Hungría para afrontar o reto máis importante do ano
Por Manu Otero
A comitiva española xa está na cidade húngara de Szeged para disputar esta fin de semana a única cita internacional que se mantén vixente no calendario de competicións de piragüismo. E entre a representación nacional sobresaen os nove padeeiros galegos que buscarán facerse un oco entre a elite mundial desta proba da Copa do Mundo.
Pero o piragüismo local estará pendente sobre todo de dúas mozas pontevedreses que apuntan alto. Antía Jácome e Antía Otero, a última aínda en idade xuvenil, buscarán facer historia o domingo na proba do C2-200 e C2-500 despois de conseguir o billete no selectivo celebrado no complexo deportivo David Cal de Verducido. Jácome, pola súa banda, competirá tamén na modalidade individual na proba do C1-200.
As dúas padeeiras da EP Ciudad de Pontevedra tiveron xa oportunidade de probar a pista na que se disputará esta proba mundial despois de pasar a súa primeira noite en Hungría. A primeira en competir será Antía Jácome, que o fará o vindeiro venres ás 9.40 horas na Heat do C1-200. Ese mesmo día ás 15.15 horas poderán probar a embarcación dobre para a práctica do C2-500. A proba de lume está programada para o domingo, coa celebración da primeira das carreiras, o C2-200 ás 11.40 horas.
A das dúas Antías non é a única presenza reseñable en Szeged para o piragüismo pontevedrés. Alí está tamén o morracense, que adestra a diario no CGTD, David Barreiro para buscar a gloria no C1-1000 e C1-500.
A representación galega complétana catro padeeiros do Kaiak Tudense encabezados por Roi Rodríguez que competirá en tres regatas: K1-5000, K2-1000 e K2-500 acompañado polo catalán afincado en Tui Albert Martí. Xunto a el estarán os seus compañeiros de equipo Lara Feijoo ( K1-200 e K2-500) e Pedro Vázquez ( K2-500 e K4-500).
A barbancesa Raquel Dacosta tomará a saída nas probas do C1-500 e C1-5000, mentres que o seu compañeiro de equipo no Rías Baixas, Adrián Mosquera, participará nas diferentes probas da modalidade de paracanoe.
Relacionadas:
-
Antía Jácome e Antía Otero reciben o apoio do Concello e xa pensan no seu próximo obxectivo, o Preolímpico
Por Diego Espiño |
-
Antía Jácome e Antía Otero vencen na Copa do Mundo en Hungría
Por Almu Dapena |
-
Antía Jácome, Antía Otero e David Barreiro tamén viaxarán a Hungría para disputar a Copa do Mundo de Sprint
Por Redacción |
-
O control selectivo para a Copa do Mundo de Szeged reúne en Verducido á elite do piragüismo nacional
Por Redacción |