Tripla representación pontevedresa no Europeo Sénior de taekwondo
Por Redacción
A localidade bosníaca de Sarajevo acolle estes días o Campionato de Europa Sénior de Pesos Olímpicos de Taekwondo, unha das grandes citas do ano a nivel internacional.
Ata alí desprazáronse tres representantes do taekwondo pontevedrés, satisfeitos por poder volver competir ao máximo nivel.
Trátase de Arlet Ortíz (-57 kg) e Iván García (+80) do Mat' s de Marín e da pontevedresa Sara Cortegoso (-49), do Mace Sport.
O primeiro en competir será Iván, este xoves día 10. O deportista, que adestra habitualmente no Centro Galego de Tecnificación Deportiva, destacou que "persoalmente despois de non participar en ningún campionato desde marzo, as ganas de volver saír a un tapiz son enormes e moito máis sendo un Europeo", polo que o seu obxectivo será "seguir adaptándome ao peso, pasar as máximas roldas posibles e deixarnos todo no tapiz".
Sara Cortegoso pola súa banda explicou á Federación Galega de Taekwondo que "estiven a adestrar moi duro todo este tempo e sen incidentes e síntome preparada e motivada para este campionato e sobre todo con moitas ganas de competir e gozar do evento".
Por último Arlet recoñeceu ante a cita continental que "penso que estamos a facer un moi bo traballo e síntome preparada para competir. Sei que despois de tanto tempo poida que as sensacións non sexan as mellores, pero estou a desexar afrontar este novo reto e tentar facelo da mellor maneira posible", sinalou.
A competición nas categorías de Arlet Ortiz e de Sara Cortegoso están programadas para a xornada do venres día 11.
Relacionadas:
-
Sara Cortegoso, Arlet Ortiz e Iván García, ao asalto de Bulgaria e Turquía
Por Redacción |
-
Sara Cortegoso e Arlet Ortiz despídense do Europeo de Pesos Olímpicos de Sarajevo sen opcións de medalla
Por Redacción |
-
Iván García, ás portas de combater por medalla no Europeo de Pesos Olímpicos de Sarajevo
Por Redacción |
-
O Europeo Absoluto, unha oportunidade para Sara Cortegoso
Por Redacción |
-
Sara Cortegoso e Iván García, de concentración nacional en Murcia
Por Redacción |