A loita pola permanencia na Segunda RFEF, nun puño
Por Diego Espiño
Sen respiro para o Pontevedra Club de Fútbol e tampouco para os seus afeccionados, que ven con sufrimento como o descenso á Terceira RFEF segue demasiado preto unha semana máis.
O empate dos granates este domingo no Estadio Municipal de Pasarón fronte ao Lealtad (0-0) unido ao resto de resultados na liguiña pola permanencia na Segunda RFEF deixan a clasificación nun puño.
Dos oito equipos implicados, os cinco primeiros atópanse separados por só tres puntos de distancia. O Pontevedra mantense á fronte con 26 puntos, seguido dun Coruxo que escala á segunda praza con 25 tras golear o Oviedo B, que tamén conta con 25 puntos na terceira posición. Son os tres equipos que a día de hoxe salvaríanse da queima, aínda que a terceira praza depende da puntuación doutros grupos.
Por detrás, xa en descenso directo e con 24 puntos, só dous menos que o Pontevedra, aparece un Salamanca CF UDS que superou pola mínima o Covadonga, mentres que o Lealtad acumula 23 puntos. Máis lonxe completan a táboa o Sporting B con 18 puntos, o Guijuelo con 16 e o Covadonga con 15.
Con este panorama cada xornada preséntase como unha final, e é o que vivirán os pontevedreses o vindeiro domingo 25 de abril na súa visita ao Real Oviedo B, nun encontro que se fixou para as 18.00 horas da tarde e no que só vencer permitirá manter unha mínima tranquilidade xusto cando se chega ao ecuador da fase pola permanencia.
Para a cita Luisito recuperará a un dos futbolistas con maior peso do plantel, Charles, tras cumprir un encontro de suspensión, mentres que Jorge Fernández continuará sendo baixa por lesión.
Relacionadas:
-
Empate que sabe a pouco para o Pontevedra en Oviedo (0-0)
Por Diego Espiño |
-
O Oviedo B, un filial "un pouco máis feito" que o Sporting
Por Diego Espiño |
-
O que lle faltaba ao Pontevedra: Charles retírase lesionado do adestramento e é dúbida para viaxar a Oviedo
Por Diego Espiño |
-
O Pontevedra, lento e desacertado, estrélase contra o muro do Lealtad (0-0)
Por Manu Otero & Cristina Saiz |
-
Luisito pide o apoio da afección para derrotar ao Lealtad e evitar o descenso
Por Manu Otero |
-
Rufo lesiónase e o Pontevedra queda sen dianteiros para recibir o Lealtad
Por Manu Otero |
-
Imanol pide centrarse nas seis xornadas que quedan e deixa no aire a súa continuidade como granate
Por Manu Otero |