Desde o Club Boa Vila ao Campionato de Europa de tiro con arco
Por Redacción
Desde Pontevedra a Maribor, Eslovenia, para participar no próximo Campionato de Europa de Tiro con Arco 3D.
É o que fará en poucas semanas Maika Fernández, deportista do Club Boa Vila e que acaba de ser seleccionada pola Federación Española para tomar parte na competición continental.
A convocatoria supón todo un premio para o traballo do club pontevedrés e para a propia deportista tras asinar unha notable tempada.
En concreto Maika proclamouse este curso campioa galega nas modalidades de 3D e Campo, colgou a medalla de prata no Campionato de España 3D e subiu ao podio en xornadas da Liga Nacional en ambas as modalidades.
O Campionato de Europa 3D de Maribor celebrarase entre o 30 de agosto e o 4 de setembro.