Máis de 500 piragüistas para a cuarta edición do Trofeo Internacional Entre Pontes
Por Redacción
O río Lérez encherase este sábado 17 de xullo de piraguas coa celebración do IV Torneo Internacional Entre Pontes, organizado pola Escuela de Piragüismo Ciudad de Pontevedra.
A pesar de que a situación da pandemia deixou á proba sen a esperada participación portuguesa, daranse cita en Pontevedra ata 36 clubs galegos cos que competirán máis de medio milleiro de deportistas.
"Esta regata para nós ten un sentido de homenaxe aos clubs", sinalou na súa presentación o edil de Deportes, Tino Fernández.
Pola súa banda o presidente da EP Ciudad de Pontevedra, Óscar Ponte, explicou que "a saída se dará desde o pantalán de catamaráns subindo ata O Burgo". Será un percorrido de dúas voltas cun total de 8 quilómetros.
Como novidade nesta ocasión ademais das categorías habituais de canoa e kaiak "entramos dentro do Open Paracanoe a nivel nacional", confirmou Ponte.
A proba dará comezo ás 10.00 horas contando ata a 13.00 hora con catro quendas de saída para as diferentes idades e categorías.