Pontevedra recollerá en Abu Dhabi a testemuña da Gran Final das Series Mundiais de Tríatlon
Por Almu Dapena
Comeza a conta atrás para a Gran Final das Series Mundial de Tríatlon, que se celebrarán en Pontevedra do 20 ao 24 de setembro de 2023, recollendo a testemuña de Abu Dhabi.
É precisamente a cidade árabe a que acollerá o gran evento do tríatlon olímpico mundial do 24 ao 26 de novembro deste ano, e onde a Boa Vila enviará desde o martes 22 ao luns 28 de novembro unha pequena delegación para recibir a bandeira e informar e convidar a todos os participantes para que veñan a Pontevedra a participar o ano que vén.
"Vai ser o evento do 2023 máis potente que se celebre en Galicia e no Estado", confirmou o alcalde da cidade, Miguel Anxo Fernández Lores, nunha rolda de prensa celebrada este venres. Destacou, ademais, que este evento é "un reto" para a cidade, "aínda que temos unha capacidade de organización demostrada" tanto noutros eventos de tríatlon como doutros deportes. "Pontevedra é unha cidade moi atractiva para estar e, pola experiencia que teñen os deportistas, foi aprobada por unanimidade".
Por ese motivo, Lores espera que na Gran Final sexa na que maior participación haxa e para a que calcula "entre 4.000 e 5.000 deportistas e 10.000 ou 12.000 persoas", entre os que estarán "os familiares e a xente que veña ver o evento". Son unhas cifras maiores das que se darán en Abu Dhabi porque alí "non van moitos atletas americanos, pero aquí si, xa están a reservar e está indo moi ben. Virán moitos europeos e americanos, que quedaron encantados co campionato do 2019, tanto pola acollida como pola gastronomía", engadiu.
Ademais, o 2023 é un ano preolímpico e a Gran Final das Series Mundial de Tríatlon é unha oportunidade para os deportistas para puntuar e ir aos Xogos Olímpicos de 2024 en representación do seu país, "aquí estarán os mellores que poden participar nas Olimpiadas", asegurou o alcalde.
A competición supoñerá para Pontevedra un desembolso económico grande, duns 3 millóns de euros incluíndo a Copa do Mundo celebrada este verán, e por iso están xa negociando os patrocinios. Adiantou Lores que xa está confirmado Inditex como maior investidor e, por tanto, patrocinador principal.
Pero antes, a Abu Dhabi viaxará unha expedición composta polo alcalde de Pontevedra, Miguel Anxo Fernández Lores; persoal do Instituto Municipal de Deportes (IMD), que irán como observadores; unha persoa que axudará coa distribución e a promoción de Pontevedra e que ademais actuará como tradutora; o deputado de Deportes, Gorka Gómez, e representantes da Federación Española de Tríatlon, que estarán na cidade árabe recollendo a testemuña e informando da competición do 2023.
A Gran Final das Series Mundiais é a competición estrela da World Triathlon e chegará a Pontevedra despois de disputarse en cidades como Londres, Budapest, Beijing, Auckland, Chicago, Gold Coast, Lausanne, Edmonton, e Abu Dhabi.
Relacionadas:
-
Un concerto de Tanxugueiras para iniciar a conta atrás para Gran Final das Series Mundiais de Tríatlon
Por Almu Dapena |
-
A bandeira da Gran Final das Series Mundiais de Tríatlon, preparada para ondear en Pontevedra
Por Diego Espiño |
-
Presentación de Pontevedra no World Triathlon Congress 2022 de Abu Dhabi
Por Redacción |
-
Pontevedra conta os días para a Gran Final das Series Mundiais de 2023
Por Redacción |
-
Pontevedra dá a coñecer entre os deportistas en Abu Dhabi a Gran Final das Series Mundiais de 2023
Por Redacción |
-
Actividades culturais, de lecer e turísticas completarán a programación da Gran Final das Series Mundiais de Tríatlon
Por Diego Espiño |
-
A Gran Final das Series Mundiais de Tríatlon pon o cartel de completo nos hoteis da comarca a 10 meses vista
Por Diego Espiño |
-
A Gran Final das Series Mundiais en Pontevedra xa ten datas: do 20 ao 24 de setembro de 2023
Por Diego Espiño |
-
Pontevedra vibra coa Copa do Mundo de Tríatlon
Por Diego Espiño & Cristina Saiz |
-
Petra Kurikova imponese na Copa do Mundo de Pontevedra, con gran debut da local Natalia Castro
Por Diego Espiño & Cristina Saiz |
-
Sergio Baxter 'róuballe' a vitoria na casa a Antonio Serrat na Copa do Mundo de Tríatlon
Por Diego Espiño & Cristina Saiz |
-
Así será o circuíto da Gran Final das Series Mundiais de Tríatlon en Pontevedra
Por Diego Espiño |