O xuíz disciplinario impón tres partidos de sanción a Pablo Cacharrón
Por Manu Otero
O porteiro do Pontevedra Pablo Cacharrón perderá os tres próximos partidos do equipo granate. Así o determinou o xuíz disciplinario da Real Federación Española que fixo pública este mércores a resolución das sancións correspondentes á xornada 29, na que o gardameta lucense foi expulsado por dobre amarela tras encaixar o tanto que supuxo a derrota do seu equipo.
O motivo polo que o xuíz decidiu ampliar a sanción a dous partidos adicionais é que Cacharrón dirixiuse ao árbitro do encontro "de forma agresiva" e sendo suxeitado por varios compañeiros mentres lle gritaba en varias ocasións "eres un sinvergüenza", recolle a acta do partido.
Baseándose no código disciplinario da RFEF, o xuíz impuxo dous partidos adicionais ao porteiro pola súa actitude de "menosprezo ou desconsideración" cara ao colexiado, recolle a resolución.
A reacción de Pablo Cacharrón estivo motivada porque a xogada que orixina o segundo tanto do Raio Majadohonda está, segundo cren os xogadores, precedida por unha falta sobre o lateral do Pontevedra Ángel Bastos.
O árbitro correu cara ao lugar da infracción levándose o chifre á boca para sinalar a falta, con todo non chegou a pitar e, a pedimento do seu cuarto árbitro, decidiu dar continuidade a unha xogada que acabou co gol local e condenou aos granates á derrota.
En calquera caso, Juan Señor non poderá contar co seu porteiro titular para os tres próximos partidos de liga nos que o Pontevedra recibirá ao Córdoba, visitará ao Alcorcón e xogará en Pasarón contra o Mérida.
Álvaro Cortés ou Víctor Nikolov, aínda inédito esta tempada, ocuparán o posto do carismático seteiro lucense.
Relacionadas:
-
O Mérida golea a un Pontevedra que fixo augas en defensa (1-5)
Por Almu Dapena & Cristina Saiz |
-
Álex González coroa a vitoria do Pontevedra (2-0)
Por Almu Dapena & Cristina Saiz |
-
Juan Señor quere un Pontevedra "máis resolutivo" en ataque
Por Manu Otero |
-
Samu Araújo e Yelko Pino xa traballan co grupo, do que caen Brais e Rufo
Por Manu Otero |
-
A expulsión de Cacharrón, un quebradizo de cabeza para o Pontevedra
Por Alejandro Espiño |
-
O Rayo Majadahonda castiga a falta de acerto do Pontevedra (2-1)
Por Almu Dapena |