As principais zonas de baño do concello de Soutomaior transformaranse este verán en extensións da Biblioteca Pública Luís Seoane grazas a unha nova edición do Biblioverán, unha iniciativa que achega os libros e a cultura aos espazos de lecer estival da veciñanza e visitantes.
O programa, que comezou o martes 24 de xuño e se estenderá ata o 18 de setembro, estará presente tres días á semana nas diferentes praias do municipio, sempre en horario de tarde, de 17:30 a 20:00 horas.
Os martes, os libros e actividades culturais chegarán á praia da Muxeira, no Peirao de Arcade; os mércores, será a quenda de Veiguiña Longa, en Comboa; e os xoves, a Praia da Xunqueira de Arcade completará o circuíto semanal.
A gran novidade desta edición 2025 céntrase na ampliación e diversificación das actividades de dinamización.
Segundo explicou a Silvia Cernadas, concelleira de Cultura, durante a presentación do programa, "este ano incorporamos obradoiros de monicreques, contos teatralizados e contadas en inglés", enriquecendo así unha oferta que xa gozou de "boa acollida nos últimos dous anos".
Ademais da posibilidade de ler ao aire libre, os usuarios poderán realizar préstamos e devolucións de libros sen necesidade de desprazarse ao local da biblioteca, participar en lecturas compartidas e gozar das diferentes actividades de animación á lectura programadas.
Todo isto co obxectivo fundamental de "manter o hábito lector durante a época estival", destacou Cernadas.
A programación completa de actividades pode consultarse na web municipal.