Recuperar e conservar a memoria fotográfica de Bueu é o obxectivo principal da nova iniciativa "Bueu en imaxes", promovida polo Concello en colaboración co Festival Internacional de Cinema de Bueu (FICBUEU). O proxecto, presentado este martes nunha rolda de prensa, busca recompilar fotografías antigas para crear un arquivo visual aberto á cidadanía.
No encontro cos medios estiveron presentes Carmen García, concelleira de Cultura; Alberto Moital, edil de Patrimonio Cultural; e María Ruíz-Falcó, codirectora do FICBUEU. Segundo explicaron, o proxecto pretende recoller imaxes anteriores ao ano 2000 para dixitalizalas e clasificalas por temática, autoría, data e persoa cedente. O resultado será un fondo documental co que preservar a historia gráfica do municipio.
"Queremos crear un fondo local co que manter viva a memoria e que sirva tamén para organizar exposicións", destacou Carmen García. Pola súa banda, María Ruíz-Falcó subliñou que o proceso será accesible para toda a veciñanza, facilitando a entrega e escaneo das fotografías en boa calidade.
A presentación oficial da iniciativa terá lugar este xoves, 23 de outubro, ás 20.00 horas na Biblioteca Municipal Torrente Ballester. Alí explicaranse todos os detalles sobre como participar.
O proxecto tamén terá un compoñente educativo, xa que o equipo do FICBUEU implicará os centros escolares na recollida de imaxes. "O alumnado pode actuar como ponte coas familias e contribuír activamente á recolección de fotografías", explicou Alberto Moital.
Nesta primeira edición, o foco estará posto nas imaxes que retraten costumes e tradicións da vila. A intención é continuar nos próximos anos con outras temáticas que permitan seguir ampliando este arquivo da memoria colectiva.
A cidadanía poderá achegar as súas fotografías a partir do luns 27 de outubro e ata o 15 de decembro, nos luns e mércores en horario continuo de 10:00 a 19:00 horas.
