O grupo Os Chichisos conmemora este Nadal de 2025 o seu vixésimo cuarto ano levando os tradicionais 'Cantos de Reis' polas rúas e prazas do concello de Pontevedra.
Acompañados por unha formación instrumental variada e un grupo de nenos e nenas, a agrupación busca preservar unha das máis fermosas expresións do patrimonio cultural galego.
Os 'Cantos de Reis' son unha arraigada tradición galega na que cuadrillas de mozos percorrían as casas na véspera de Reis, entoando melodías e letras populares a cambio do 'aguinaldo', que adoitaba ser en especie.
Esta recollida de alimentos e doces culminaba nunha festa ou foliada conxunta. A temática destes cantos xira, tradicionalmente, arredor da visita dos Reis Magos a Cristo, a fuxida á Exipto ou a viaxe da Sagrada Familia, a miúdo con alusións á viaxe e ao renacemento do sol no solsticio de inverno.
Caracterizados por melodías longas e lentas, con abundancia de adornos interpretados pola gaita, os 'Cantos de Reis' posúen un estilo propio, con tons guturais e un curioso solapamento dos finais de estrofa cos comezos.
Moitos destes cantares teñen unha orixe culta, con raíces en cantos gregorianos e relixiosos dos séculos XV e XVI, adaptados e transformados pola sabedoría popular. Non é raro atopar moitos deles en castelán ou 'castrapo', froito da súa orixe en textos bíblicos ou da busca de agradar aos anfitrións.
Dende hai 24 anos, Os Chichisos, co seu acordeón, gaita, frautas, guitarra, tamboril e bombo, alegran as rúas nestas datas.
ENSAIOS
Para esta edición, o grupo ten programados ensaios os días 26, 29 e 30 de decembro, e 2 e 3 de xaneiro, na Casa do Pobo de Bértola (Vilaboa) ás 20:00 horas.
A actuación principal terá lugar o 4 de xaneiro, de 17:30 a 20:00 horas, percorrendo emblemáticas prazas e rúas de Pontevedra como a Praza da Liberdade, San Xosé, rúa da Oliva, rúa da Peregrina/Daniel de la Sota, Praza da Peregrina, Praza da Ferrería e Praza de Curros Enríquez.
Esta actividade está incluída no Programa de Nadal do Concello de Pontevedra.