Fernando Salgado presenta '¿Qué miras?' en Cuntis con Susi Maquieira, protagonista do libro

Umia
28 de decembro 2023

A presentación vai desenvolverse este venres 29 ás 20.00 horas na Casa da Cultura de Cuntis coa participación do autor; a protagonista; a escritora Baia Fernández de la Torre; e Augusto Metztli, deseñador da portada

Susi Maquieira e o escritor Fernando Salgado
Susi Maquieira e o escritor Fernando Salgado / Concello de Cuntis

Susi Maquieira Velay naceu en Cuntis fai cincuenta anos e ten máis experiencias vitais que moitas das persoas que lle lanzaron comentarios sarcásticos pola súa estatura.

Promoveu a creación da Asociación Avanzar, que presidiu durante un tempo, para lograr que persoas con discapacidades físicas e psíquicas de distintos municipios tivesen as mesmas oportunidades de gozar de actividades formativas e lúdicas.

Ela é a protagonista do último libro do xornalista Fernando Salgado, que leva por título '¿Qué miras?'. 

Nesta narración cóntase como Susi Maquieira lanzouse por nunha tirolesa desde o Morro de Säo Paulo; baixou pola neve en Canadá e viviu como unha estudante en Roma, ademais de realizar outras viaxes a Londres ou ás Illas Canarias. Ten o carné para patronear unha embarcación náutica recreativa, pinta e dedicouse á moda e ao deseño.

Este venres 29 de decembro, ás 20.00 horas, tanto Fernando Salgado como Susi Maquieira falarán sobre este libro nun acto que se realizará na Casa de Cultura de Cuntis con entrada libre.

No acto participarán tamén a escritora Baia Fernández de la Torre e o deseñador da portada Augusto Metztli.