Pintor, escultor, arquitecto e tolo da arte. Así se define Kike Ortega, un artista pontevedrés que durante este mes de xullo mostra doce recreacións de elementos característicos de Galicia no local do número 21 da rúa Sagasta coa intención de que a cidadanía coñeza a súa obra.
Trátase de pezas que, baixo o título de 'O camiño das bateas', ofrecen novas propostas de elementos arquitectónicos e outras singularidades vencelladas ao Camiño de Santiago.
Os visitantes teñen a oportunidade de ver a capela da Peregrina ou a versión de Ortega da catedral de Santiago.
A característica principal desta mostra do creador é que todas as obras están realizadas utilizando madeiras e pezas recicladas de bateas das rías galegas.
Ata o local achegábanse esta semana tanto o alcalde Miguel Anxo Fernández Lores como Demetrio Gómez, concelleiro de Cultura, para coñecer esta última colección dun artista local que sempre sorprende.