O mércores 10 de abril ás 20.00 horas inaugúrase a exposición pictórica 'Utopías' da artista Galia Blanco coa presenza do pintor Antón Sobral, que realizará a presentación.
Nesta mostra ofrécense traballos da artista compostelá residente en Poio que forman parte das series 'Eternas' e 'Harmonía'.
Combínase a abstracción de xogos de cores coa forza e a intelixencia das mulleres tanto reais como de ficción a través de retratos.
Xornalista e pintora, Galia Blanco compaxina a arte e a comunicación durante a súa traxectoria profesional
Como artista destacan os seus 'Popsportraits', retratos pop cos que comezou a súa carreira e que continúa realizando por encargo. Tamén se fixo coñecida por series como 'Agropop', onde ofrece unha combinación entre o rural de Galicia e a arte contemporánea.
A mostra permanecerá aberta na sala de exposicións do Ateneo Santa Cecilia de Marín ata o sábado 27 de abril.