Israel sitúase no punto de mira da pontevedresa Águeda Cons, que a próxima semana afrontará un dos grandes obxectivos da tempada, o Campionato de Europa Junior de Natación.
A nadadora do Galaico inicia este mércores 21 de xuño a concentración previa á competición no Centro de Alto Rendemento de San Cugat, en Barcelona, xunto ao resto do equipo nacional.
Alí estará a afinar a súa posta a punto ata o próximo día 24, cando a Selección Española poñerá rumbo á localidade de Netanya, onde se disputará o Europeo entre o 28 de xuño e o 2 de xullo e onde tamén estará a súa adestradora no Centro Galego de Tecnificación Deportiva, Luisa Domínguez.
Águeda Cons disputará catro probas, que veñen sendo os 400, 800 e 1.500 libre e a remuda 4x200 estilo libre.
Tras esta competición a deportista pontevedresa centrarase no grande reto do ano, o Mundial Junior de natación que terá lugar na localidade estadounidense de Indianápolis do 23 ao 28 de agosto.