Unha vez máis, o Pontevedra Club de Fútbol viuse obrigado a mover un dos seus partidos de liga pola incidencia da Copa do Rei.
Fíxoo ademais co máis próximo en data, o que debía disputar inicialmente o domingo 1 de decembro (17.00 horas) no Estadio Municipal de Pasarón fronte ao Salamanca CF UDS, quinto clasificado do campionato.
Do mesmo xeito que sucedeu até en dúas ocasións polo cruzamento copeiro co Levante, os horarios fixados para a segunda rolda da Copa deixaban pouca marxe para o descanso para os futbolistas.
Non só para o Pontevedra, que espera ao Villarreal o mércores 4 de decembro, e é que a situación era aínda peor nun Salamanca cuxo partido do Torneo da K.O. fronte ao RC Celta foi fixado para o martes 3 (21.00 horas), superando por moi pouco as 48 horas de descanso mínimo que esixe a normativa entre partidos.
Por ese motivo ambos os dous clubs solicitaron á Real Federación Española de Fútbol adiantar o seu duelo ao sábado día 30 de novembro.
A decisión de Competición fíxose de rogar, pero finalmente aceptou a solicitude.
Desta forma o partido entre Pontevedra e Salamanca xogarase definitivamente o sábado 30 ás 20.00 horas no Estadio Municipal de Pasarón.
No caso dos granates, atoparanse tamén con pouco descanso despois da Copa, e é que o seu seguinte xornada de liga no campo do CD Laredo fixouse para o sábado 7 de decembro (18.00 horas).