O sábado 16 de maio promete ser unha xornada de intensa actividade deportiva en Caldas de Reis.
A culpa tena a quinta edición da Carreira de Orientación de Caldas de Reis, que se celebrará entre as 17.00 e as 20.00 horas por camiños e sendeiros do monte de Santa María e pola contorna de Segade e o río Umia.
Nela, estima o Concello, participarán máis de 200 persoas entre o seu tres modalidades confirmando que se trata xa dunha cita consolidada no calendario deportivo local.
A organización proverá dun mapa do monte ás persoas participantes, así como dun cartón electrónico para ir rexistrando o paso por cada baliza.
Competirase na modalidade Rogaining, que consiste en conseguir o maior número de puntos (cada punto de referencia terá unha puntuación diferente) no menor tempo posible.
É posible participar de maneira individual ou por grupos de até seis integrantes.
As categorías habilitadas son 'xestiñas', pensada para menores de idade cunha ruta sinxela física e tecnicamente de menos de 4 quilómetros; 'xestas', xa para persoas adultas cun nivel físico e técnico medio e menos de 5 quilómetros en total; e 'xesteiras', para persoas con experiencia e coñecementos de orientación medios e altos e nivel físico e técnico alto cun percorrido de máis de 7 quilómetros.
As inscricións, de balde, aínda poden formalizarse na páxina xestanatureza.com.
"O noso obxectivo é que esta carreira de orientación sexa unha experiencia para todas as idades, unha maneira diferente de descubrir os montes de Caldas á vez que se fai deporte e se aproveita unha xornada de natureza en familia ou coas amizades", explicou sobre o evento o concelleiro de Deportes e tenente de alcalde de Caldas, Manuel Fariña.
Esta proba terá continuidade o domingo 31 de maio coa Carreira de Orientación Urbana.