Víronse as caras na última Liga Asobal e volverán a facelo este domingo na final da Supercopa Galicia. O Cisne e o Cangas son os dous equipos que loitarán polo título autonómico, tras derrotar o Acanor Novás e o Lalín, respectivamente.
Para o Cisne non foi unha semifinal doada. Aínda que o Novás afrontaba o partido con importantes baixas, estivo moi concentrado no partido, que chegou ao descanso con empate a 16 goles no marcador.
Na segunda metade, parecía que os de Pontevedra lograban poñer distancia cos seus rivais, pero estes volveron a reaccionar e chegaron con opcións á vitoria ao tramo final do partido.
Con todo, nos minutos finais o Cisne reaccionou que pechou o triunfo sen sufrimento. O resultado final, 32-30 ao seu favor.
Antes da final, que se disputará ás sete da tarde no Pavillón do Gatañal, en Cangas, a Federación Galega de Balonmán renderá unha sentida homenaxe ao adestrador Fran Teixeira, recentemente falecido.