O Galaico quere facerse co trofeo galego de división de honra por terceiro ano consecutivo. A primeira posición conseguida este sábado 10 de marzo na piscina Rosario Dueñas de Ourense, na terceira xornada da fase inicial, mantén aos de Pontevedra como favoritos por diante do Pabellón de Ourense e o Club Natación Ferrol, segundos e terceiros respectivamente.
A fase final do campionato celebrarase na casa do Galaico, no Complexo Deportivo Rías do Sur o próximo mes de abril.
Os pontevedreses subiron ao podio na maioría das probas disputadas durante esta terceira xornada, sendo os gañadores nas remudas de 4x50 libres e 4x100 estilos. Tamén conseguiron a vitoria as categorías individuais de 400 estilos feminino, 200 braza feminino, 50 costas masculinos e 800 libre feminino.
Algúns dos resultados obtidos polos nadadores do Galaico entran dentro das marcas mínimas nacionais, dando acceso aos campionatos de España de verán de 2018.