O ascenso a Primeira Federación, enfrontamentos contra rivais históricos do fútbol español, a comuñón entre equipo, afección e cidade forxada o pasado curso, o avance cara a unha estabilidade económica e deportiva, a reconciliación co club de vellos afeccionados ou o encanto de Pasarón e o seu ambiente. Múltiples son as posibilidades, pero a realidade é que o Pontevedra pintou de granate 500 novos corazóns neste inicio de curso.
Ampliar a masa social e recuperar antigos abonados era un dos obxectivos da campaña de socios lanzada a finais do mes de xullo. E aínda que é certo que o Pontevedra aínda ten un longo camiño por diante para recuperar cifras de décadas pasadas, as cifras certifican que a meta está cada vez máis preto.
Antes do partido inaugural contra o Alcorcón, o salto no número de abonados foi notorio. Superouse a barreira dos 1.700 socios a finais de agosto. E, pinga a pinga, o número de socios non deixa de medrar.
"A campaña vai ben, seguimos facendo socios todos os días e moitas altas novas, xa superadas amplamente as 500", confirman desde as oficinas de Pasarón.
Agora, co segundo partido como locais ao virar a esquina, no club esperan un segundo empuxón que sitúe ao equipo na zona media alta da táboa en canto a número de abonados.
CAMISETAS ESGOTADAS
Tamén son conscientes en Pasarón do interese de moitos afeccionados por adquirir a camiseta oficial deste tempada, que leva estampada a silueta da Peregrina. Con todo, o envío de mercadoría segue atrasándose por cuestións alleas á entidade granate. Tan pronto como chegue o camión, no club comprométense a comunicarllo á inchada para que poidan facerse cunha dos equipamentos que máis fondo calaron dos últimos anos.