O temporal que azoutará Canarias esta fin de semana alterou os plans deportivos da Sociedad Deportiva Teucro. O seu partido en Lanzarote, contra o San José Obrero, foi aprazado tras declararse a alerta máxima nas illas.
Así o decretou o goberno canario, unha medida que xa entrou en vigor ás 00:00 horas deste sábado e que, entre outras cuestións, obriga ao peche das instalacións deportivas e á suspensión de todo tipo de actividades ao aire libre.
Ante esta situación, o comité de competición da Real Federación Española de Balonmán acordou suspender o encontro que o Teucro debía disputar este sábado, o segundo nesta etapa na Primeira Nacional do balonmán español.
Agora, ambos os dous equipos deberán buscar nun prazo de sete días unha nova data para disputar o partido e, en caso de non existir acordo, será o propio ente federativo o encargado de programar o encontro.
A suspensión chegou a oídos dos responsables do club pontevedrés cando estaban a piques de iniciar o seu desprazamento ata o aeroporto de Santiago.
O Teucro non é o único equipo galego afectado pola suspensión da xornada cos equipos canarios, xa que o Xiria e o A Cañiza tamén debían viaxar ás illas e o Bueu Atlético ía recibir o casa ao Gáldar. Estes tres encontros foron tamén aprazados.