Pablo Dapena repite podio no Challenge de Praga

Pontevedra
27 de xullo 2019

Aínda que chegaba con problemas no nocello despois dos adestramentos, o pontevedrés conseguiu finalizar terceiro a proba internacional, a primeira do seu segundo bloque da tempada

Pablo Dapena no podio do Challenge de Praga
Pablo Dapena no podio do Challenge de Praga

Despois de varias semanas de parón, Praga foi, durante este sábado, o campo de competición de Pablo Dapena na que foi a súa primeira proba do segundo bloque da tempada. Nesta ocasión, no Challenge da capital checa, ao que o pontevedrés chegaba con problemas. Durante os adestramentos sufriu unha  torcedura de nocello ademais dunha caída da bicicleta, o que, con todo, non pareceu afectarlle durante a carreira.

Dapena viaxou a Praga co listón alto despois da segunda posición do ano pasado, cruzando a liña de meta só por detrás de Javi Gómez Noya, quen, non acudiu á proba de media distancia desta fin de semana. E cumpriu coas expectativas conseguindo subirse ao podio.

O primeiro tramo a nado foi para el, que conseguiu saír da auga en primeira praza con 13 segundos de vantaxe sobre o grupo formado por sete homes, os favoritos da competición. Sen embargo, despois da primeira transición, Dapena comezou a perder terreo, ata colocarse na novena posición, chegando ao segundo cambio xunto ao alemán Frederik Funk a 5:30 do primeiro. Florian Angert, Pieter Heemeryck, Thomas Steger e Thomas Davis foron os mellores durante o segundo sector. 

Os 21 quilómetros de carreira a pé comezaron con Angert sendo consciente da súa ampla vantaxe sobre o resto e co pontevedrés máis forte que os seus rivais. Despois do quilómetro e medio, no que Dapena xa conseguira remontar posicións, colocándose cuarto, sacou garra e meteuse nas posicións ao podio, con  Angert e Heemeryck por diante

Finalmente, o galego mantivo o nivel e, estirando a súa enerxía ata o final, cruzou a liña de meta en terceira posición cun tempo de 3:59:04.2.

Agora toca seguir coa segunda parte da tempada con vistas ao seu obxectivo: o Mundial 70.3, que se desenvolverá o próximo mes de setembro en Niza.

Consulta os tempos completos de Pablo Dapena no Challenge de Praga.