Recital do Pontevedra con goleada ao Zamora

Sábado de goce e goles o vivido este sábado en Pasarón.

O Pontevedra Club de Fútbol puxo o broche a unha semana perfecta dando un recital de fútbol fronte ao Zamora, ao que goleou por catro goles a un, acertando practicamente todas as que tivo e sen conceder apenas en defensa, fóra da xogada do gol. Yelko abriu a lata, Farrel empatou no desconto do primeiro tempo e Selma, Alain e Brais sentenciaron na segunda metade.

Os granates foron dominadores durante practicamente todo o primeiro tempo e seu foi o primeiro aviso cando apenas se cumpriron dous minutos. Garay abriu a banda dereita, pero o centro-chute de Luisao foise completamente desviado por liña de fondo. Catro minutos despois, Brais buscou o gol cun disparo desde o bordo da área tras un saque de esquina a favor que se foi directo ás mans de Fermín.

Continuaron os granates sendo donos do balón, mantendo completamente afastado o perigo da portaría dun Marqueta que vía o partido como un mero espectador, mentres que no campo contrario a zaga zamorana tíñase que empregar a fondo para desbaratar as múltiples ocasións locais.

Selma e Brais foron os protagonistas dunha bonita parede na frontal da área que o '8' rematou moi alta para, posteriormente, asociarse de novo con Luisao para que se plantase só ante Fermín. Con todo, un defensor do Zamora evitouno.

O único disparo do cadro visitante chegou no minuto 19 cunha falta ao bordo da área que botou Carlos Ramos directa á cabeza de Tiago.

No ecuador do primeiro tempo produciuse a oportunidade máis clara do Pontevedra. Selma roubou no centro do campo e foise en velocidade, pero á hora da verdade Rufo rouboulle o balón limpamente e desbaratou a acción.

E á media hora de xogo, o técnico do Zamora, Juan Sabas, solicitou o FVS por unha posible vermella a Yelko por soltarlle o brazo a Clavería que o colexiado castigou con cartón amarelo.

Alcanzouse entón a recta final do primeiro tempo na que, para variar, ocorreu de todo. Era o minuto 43 e Garay sacou de banda desde a dereita para Luisao e este fixo un cambio de orientación cara a Tiago, que conduciu até o bordo da área e deulla a Yelko entre defensas para, ao primeiro toque, aloxar o esférico no interior da portaría visitante.

O partido púxose aínda máis de cara para o Pontevedra tan só un minuto despois, cando Selma rouboulle a carteira a Luismi e este agarrouno para evitar que se plantase só ante Fermín. O colexiado non dubidou e mostroulle o cartón vermello, deixando ao Zamora cun xogador menos sobre o verde.

Restaban aínda o sete minutos de engadido e as ocasións non cesaron, pasando dun posible 2-0, que Fermín evitou de socato tras un cabezazo de Brais, ao gol do empate.

Foi a balón parado e calcado ao encaixado esta mesma semana fronte á Unión Deportiva Ourense. Carlos Ramos colgou unha falta desde a esquerda, Athuman deixou de cabeza e Farrel fixo o 1-1.

Na segunda parte o guion non cambiou e o Pontevedra seguiu dominando, favorecido pola superioridade numérica. Nada máis regresar dos vestiarios avisou Yelko e ao cinco minutos chegou o 2-1 tras un enviou de Garay que Selma rematou á rede. Farrell respondeu pouco despois, batendo entre o tres paus e obrigando a Marqueta a intervir.

Moveu entón ficha Rubén Domínguez e deu entrada a Álex e Alain en lugar de Selma e Luisao. E no primeiro balón que tocou o '6', atopou o premio. Yelko sacou de esquina, un defensor do Zamora peiteou cara atrás e Alain apareceu no segundo pau para facer o 3-1.

A partir de aí foi un continuo monólogo granate, especialmente pola banda esquerda onde Álex González facía practicamente o que quería. No 74 o seu disparo deu nun defensor e Fermín parouno, e no 84 correu só desde o medio centro, plantouse ante a defensa e regaloulle o balón a Brais, que conduciu até plantarse ante o gardameta rival para marcar o cuarto e definitivo gol do Pontevedra.

PONTEVEDRA CF (4): Marqueta, Miki Bosch (Resende, min. 46), Brais Abelenda (Compa, min. 85), Selma (Alain, min. 61), Yelko (Juanra, min. 67), Miguel Cuesta, Vidorreta, Luisao (Álex, min. 61), Garay, Montoro e Tiago.

ZAMORA CF (1): Fermín, Luismi, Merchán, I Athuman, Rufo, Eslava, Carlos Ramos (Mario, min. 56), Clavería (Markel, min. 56), Farrel (Carbonell, min 73), Monerris (Erik, min. 49) e J. Sancho (Kike Márquez, min. 46).

Árbitro: Aimar Velasco (País Vasco), asistido en bandas por Yuval Conde e Nahia Alonso. Amoestou a Montoro (14'), Yelko (32'), Miki Bosch (49') no Pontevedra, e a Athuman (88') no Zamora. Expulsou con vermella directa ao xogador visitante Luismi (44').

Goles: 1-0, Yelko, min. 43. 1-1, Farrell, min. 45+5. 2-1, Selma, min 50. 3-1, Alain, min. 63. 4-1, Brais Abelenda, min. 84.

Incidencias: Partido da décima xornada de liga en Primeira RFEF disputado no Estadio Municipal de Pasarón ante 2.305 espectadores.