Dezasete equipos disputarán, entre os días 11 e 14 de setembro, a edición número 23 da Volta a Galicia, unha competición que está destinada a corredores das categorías elite e sub-23.
Serán, en total, catro etapas con finais en Ribadumia, Caldas de Reis, Barreiros e Ferrol.
Esta Volta a Galicia, ademais, renderá homenaxe ao ex ciclista profesional Samuel Blanco, gañador da proba no ano 2016, despois da súa retirada do ciclismo profesional.
A primeira das catro xornadas, o xoves 11 de setembro, terá como escenario o concello pontevedrés de Ribadumia. A Volta abrirá cunha contra o reloxo individual de 7,3 quilómetros nun terreo case por completo chairo.
O segundo día, de novo na provincia de Pontevedra, Caldas de Reis exercerá de saída e meta dun percorrido de 138 quilómetros con catro portos puntuables para a clasificación da montaña, dous deles dentro dos últimos 20 quilómetros.
Nese treito final os ciclistas subirán primeiro Lobeira e despois O Pousadoiro, que se coroará a 7 quilómetros para a conclusión da etapa.
A terceira tirada levará á caravana da Volta ata o concello de Barreiros, na Mariña lucense, para celebrar a etapa raíña. Nun itinerario de 147 quilómetros acumularanse máis de 2.500 metros de desnivel, a maioría na parte final cos altos de Augaxosa, Fórnea e Monte Comado.
A coroación do vencedor da xeral terá lugar o domingo en Ferrol, nun fermoso fin de festa con chegada ao carón do mar. O trazado de 130 quilómetros inclúe dous pasos intermedios pola cidade e nese circuíto final ascenderase o alto da Bailadora antes de concluir no porto de Ferrol.
Con respecto aos equipos participantes, estarán na liña de saída dezasere formacións, entre elas tres escuadras internacionais.
Destaca a representación galega con oito conxuntos: Cortizo, Vigo-Rias Baixas, Supermercados Froiz, High Level-Gsport, Lasal Cocinas ODL, Maxge Ambilamp, Club Ciclista Vigués e Team Oiense.
Estarán tamén estruturas de gran nivel no ámbito estatal como Caja Rural ALEA, Extremadura Pebetero, Gomur, Torres Sobato, Technosylva Maglia Rower Bembibre e Telco ON Clima Osés.
E, por último, desde Portugal chega o Maia Earth Consulters e desde Italia os outros dous equipos, o Campana Imballagi e a Ciclistica Rostese.
En cada xornada entregaranse as camisolas de líder ao primeiro na clasificación xeral. Será o maillot amarelo patrocinado pola Xunta de Galicia.
Tamén haberá recoñecementos ao rei da montaña, coa camisola branca a puntos vermellos; ao mellor galego, coas cores branca e azul da bandeira autonómica; o maillot verde das metas voantes; e o azul de primeiro sub-23.